ՄԽ-ն ցանկանում է ուժեղացնել թուլացած դիրքերը և թույլ չտալ ռազմական գործողությունների վերսկսում. Ստյոպա Սաֆարյան
Մինսկի խմբի թիվ մեկ մտահոգությունը թույլ չտալ, որպեսզի իրավիճակը դուրս գա վերահսկողությունից և վերաճի ռազմական գործողությունների, ինչի միտումը կա: Այս մասին Tert.am-ի հետ զրույցում ասաց Միջազգային և անվտանգության հարցերի հայկական ինստիտուտի ղեկավար Ստյոպա Սաֆարյանը և նկատեց, որ Ադրբեջանը շարունակվում է սպառազինվել, պատրաստվում է նոր խմբաքանակ ձեռք բերել Ռուսաստանից և նոր ռազմատեխնիկական համագործակցության պայմանագրի շուրջ է բանակցում:
Նա նշեց, որ Մինսկի խումբը հասկանում է, որ եթե ոչ այս տարի, ապա առաջիկայում հնարավոր է նման փորձ արվի: «Հրադադարի ռեժիմի խախտումները մի կողմից, մյուս կողմից բանակցային գործընթացի բացակայությունը արդեն իսկ ռիսկ են ստեղծում: Մինսկի խումբը ցանկանում է օպերատիվ լուծել մի քանի խնդիր: Նախ` ուժեղացնել իր թուլացած դիրքերը, որոնք շատ թուլացել են 2012 թվականից հետո, երբ ըստ էության, պրոցեսը կանգ է առել. 2014 թվականին ԱՄՆ նախագահության կողմից փորձ արվեց ակտիվացնել գործընթացը, բայց դա առանձնապես պտուղներ չտվեց»,-ասաց նա:
Ստյոպա Սաֆարյանը հղում կատարեց ԵԱՀԿ-ի նոր գործող Իտալիայի նախագահողի հայտարարությանը, ըստ որի` ձգձգվող հակամարտությունները լինելու են իր առաջնահերթություններից մեկը: «Իհարկե, ես չեմ հավատում, որ այդքան միամիտ են, որ մտածում են, թե կարող են բանակցային գործընթացում բեկում արձանագրել, քանի որ դրա համար և՛ միջավայր չկա, և՛ գործիքները չկան: Մի խնդիր կա, որը պետք է օպերատիվ լուծել` խաղաղությունը պահպանելու և ռազմական գործողությունների վերսկսումը բացառելու համար»,-ասաց նա և նշեց, որ պետք է արագ կյանքի կոչել մշտադիտարկման կարողությունների ընդլայնումը: Նա կարծում է, որ այդ հարցի իրականացումից հետո գուցե անցում կատարեն հետաքննական մեխանիզմների տեղադրմանը, բանակցային գործընթացի ակտիվացմանը:
«Ադրբեջանը, իհարկե, խորամանկության է դիմել, ձևական առումով ոչ էական քայլ կատարելով և համաձայնելով մշտադիտարկման կարողությունների ընդլայնմանը, և ակնկալվում է, որ դրա դիմաց կստանա առարկայական բանակցություններ»,-ասաց նա:
Ամեն դեպքում, վերլուծաբանը նշեց, որ առանձնապես մտահոգիչ զարգացումների պետք չէ սպասել, և բանակցային գործընթացի վերսկսմանը զուգահեռ հայկական կողմը լուրջ անելիք ունի` դա ֆորմատի լիարժեք վերականգնումն է, այսինքն` Արցախին գործընթացում ներգրավումը և երկրորդը` Հայաստանը պետք է աստիճանաբար Մինսկի խմբի հետ համատեղ առաջ մղի պայմանավորվածությունների մյուս կետերի իրագործումը:
«Պետք չէ բանակցային գործընթացի վերսկսմանը վատ նայել, դա թույլ է տալիս Հայաստանին և Մինսկի խմբին շատ խնդիրներ լուծել, հատկապես, երբ Մինսկի խմբի և Հայաստանի շահերը համընկնում են` ռազմական գործողություններ վերսկսում թույլ չտալու, Մինսկի խմբի դիրքերի ամրապնդման և նաև Վիեննայի պայմանավորվածությունները կյանքի կոչելու առումներով»,-ասաց նա:
Ինչ վերաբերում է դիտարկմանը, թե հնարավոր է, որ Ադրբեջանը խաղաղության դիմաց զիջումների պահանջ դնի, Ստյոպա Սաֆարյանը հիշեցրեց, որ կար ժամանակ, երբ Ադրբեջանը իսկապես փորձում էր հրամցնել տարածքներ խաղաղության դիմաց բանաձևը, սակայն ապրիլյան պատերազմը լավագույնս ցույց տվեց, որ նման բան չի կարող լինել: «Նույն ամերիկյան համանախագությունը պնդել է խնդրի համապարփակ կարգավորման մասին, ինչը ամենևին չի նշանակում` տարածքներ խաղաղության դիմաց: Ռուսական բանաձևն է ավելի շատ դա ենթադրում` տարածքներ խաղաղության դիմաց միջանկյալ կարգավիճակի տեսքով»,-ասաց նա և կրկին շեշտեց, որ բանակցային գործընթացից վախենալ և մտահոգվել պետք չէ, ընդհակառակը, Հայաստանին էլ է պետք բանակցային գործընթացի վերսկսում:
Ստյոպա Սաֆարյանը նշեց, որ փետրվարի 8-ից 9-ը սպասվող համանախագահների տարածաշրջանային այցելությունը դեռևս չի նշանակում բանակցային գործընթացի վերսկսում, դա դիրքորոշումերի հստակեցում է, և որևէ բան չպետք է կաշկանդի Հայաստանին պնդելու իր շահերը: «Այսպիսով` սա միջնորդական գործունեության ակտիվացում է, որի նպատակն է թույլ չտալ ռազմական գործողությունների վերսկսում, ամրապնդել Մինսկի խմբի դերը հակամարտության կարգավորման գործում և կյանքի կոչել արդեն իսկ ձեռքբերված փոքր որոշումը»,-ամփոփեց նա: