Аббосбек Файзуллаев учун Туркия янги босқич, янги имкониятлар...
Ўзбекистон миллий терма жамоасининг иқтидорли ва ҳужумкор футболчиси Аббосбек Файзуллаев фаолиятида янги саҳифа очилди. 21 ёшли легионер сўнгги икки мавсумда Россия чемпионатида муносиб ўйин кўрсатиб, Европа футболида ўз ўрнига эга бўлди. Энди эса, у жадал ривожланаётган Туркия Суперлигасига йўл олди — бу чемпионат сўнгги йилларда бир қатор юлдузлар ва тажрибали мураббийларни жалб этгани билан машҳур.
Эндиликда ўзбекистонлик футбол ишқибозлари “Истанбул Башакшеҳир” клуби ўйинларини алоҳида диққат билан кузатади. Чунки жамоа таркибига Аббосбек Файзуллаев билан бирга Элдор Шомуродов ҳам қўшилди — бу икки футболчининг Туркиядаги фаолияти катта қизиқиш уйғотмоқда.
Россия матбуотида Файзуллаевнинг янги трансфери расмий эълон қилингани ортидан футбол экспертлари ва мутахассислар ўз фикрларини билдиришмоқда. Айниқса, “Зенит” клуби собиқ футболчиси Алексей Гасилин бу ҳақда шундай дейди: “Ўтган мавсумда Аббос асосий таркибда камроқ ўйнади ва асосан ротация футболчиси бўлиб қолди. Лекин уни Осиёнинг энг яхши ёш футболчиси, деб тан олишди — бу унинг иқтидори юқори эканини кўрсатади. Файзуллаев жуда яхши таклиф олди, эҳтимол, у майдонда тўлиқ 90 дақиқа ҳаракат қиладиган имкониятга эга бўлади. Чунки у ўйнашни истайди”.
Гасилин айтишича, ЦСКА бу трансфердан яхши фойда кўрди — улар ўйинчи учун яхши маблағ олди ва клубнинг тижорий стратегияси амалга ошди. Айни пайтда, Файзуллаев Туркия чемпионатида мунтазам ўйнаш орқали Жаҳон чемпионатига пухта тайёргарлик кўриш имконига эга бўлади.
ЦСКАнинг яна бир собиқ футболчиси Евгений Алдонин эса бундай фикр билдирди: “Файзуллаевнинг жамоадан кетиши ҳозирча катта йўқотиш бўлмаса керак. Чунки у асосий таркибдаги жойини йўқотиб бораётган эди. Аббосга янги клубида омад ва муваффақиятлар тилаймиз. Агар шартномаси тугаётганини инобатга олсак, келаси ёз бепул кетиши мумкин эди, бугун эса клуб яхши маблағ олди”.
Эътиборлиси, Transfermarkt маълумотларига кўра, “Истанбул Башакшеҳир” Аббосбек Файзуллаев учун 7,5 миллион евро тўлаган ва шартнома беш йилга тузилган. Шунингдек, айрим манбаларга кўра, унинг натижаларидан келиб чиқиб, трансфер суммасига яна 2,5 миллион евро бонус қўшилиши мумкин. Футболчининг маоши эса, бир мавсум учун бир миллион евро этиб белгиланган.
Янги мавсумда “Истанбул Башакшеҳир” сафида ўзбек юлдузининг қандай ўйин намойиш этиши, унинг Туркия чемпионатидаги фаолияти ва келажакдаги ғалабалари футбол мухлислари учун катта интиқлик ва умид уйғотмоқда. Файзуллаев учун бу трансфер — янги имкониятлар, янги чўққилар ва халқаро майдонда ўз сўзини айтиш учун яна бир мустаҳкам пойдевор бўлади.