Մոսկվան ու Երևանն աշխատում են համատեղ ներդրումային հիմնադրամի նախագծերի իրականացման վրա. ՀՀ նախագահ
Մոսկվան ու Երևանը մշակում են համատեղ ներդրումային հիմնադրամի շրջանակում նախագծերի իրականացման ճանապարհային քարտեզ, միջոցները կարող են ուղղվել այդ թվում տեղեկատվական տեխնոլոգիաների և էներգետիկայի ոլորտում նախագծերի ֆինանսավորմանը: Այդ մասին «ՌԻԱ Նովոստի»-ին տված հարցազրույցում հայտարարել է Հայաստանի Հանրապետության նախագահ Սերժ Սարգսյանը:
Հայ-ռուսական ներդրումային հիմնադրամի ստեղծման նախագիծը ներկայացվել է 2017 թվականի հունվարի վերջին: Դրա գործունեությունն ուղղված է լինելու ճյուղերի ֆինանսավորմանը, որոնք կարող են ապահովել երկրների միջև ապրանքաշրջանառության աճ, արդյունաբերական համագործակցության զարգացում, գրում է գործակալությունը:
«Ինչ վերաբերում է ռուս-հայկական հիմնադրամին, ապա մենք շարունակում ենք աշխատանքը: Վերջերս հիմնադրամի ներկայացուցիչները ժամանել էին Հայաստան: Եթե խոսենք ներդրումների համար ոլորտների մասին, ապա դա ՏՏ-ն է, էներգետիկան, բարձրտեխնոլոգիական արտադրանքը… Այժմ կողմերն աշխատում են ճանապարհային քարտեզի մշակման վրա»,- ասել է Սերժ Սարգսյանը: