Եվրոպայի արիստոկրատիան՝ Ռումինիայի թագավոր Միխայ Առաջինի հուղարկավորությանը (լուսանկարներ)
Դեկտեմբերի 16-ին Բուխարեստում կայացել է Ռումինիայի թագավոր Միխայ Առաջինի հուղարկավորության արարողությունը, որին ներկա է եղել Եվրոպայի գրեթե ամբողջ արիստոկրատիան:
Ինչպես նշում է The Daily Mail-ը, 96 տարեկանում Շվեյցարիայի իր նստավայրում կյանքից հեռացած թագավորը Ռումինիայում իշխել է մինչև 1947թ., հետո ստիպված է եղել կոմունիստների ճնշման ներքո հրաժարվել գահից:
Պարբերականը մանրամասնում է, որ Միխայ Առաջինը կյանքի մեծ մասն անցկացրել է արտասահմանում, սակայն միշտ էլ եղել է Ռումինիայի խորհրդանիշը: Երիտասարդ թագավորի կառավարման տարիներին Ռումինիան պատերազմի մեջ է մտել ԽՍՀՄ-ի: Միևնույն ժամանակ նա քաջություն է ունեցել դուրս գալ երկրի ֆաշիստ բռնապետ Յոն Անտենեսկուի դեմ: Սակայն կոմունիստների իշխանության գալուց հետո, թագավորը ստիպված է եղել լքել երկիրը: Նա հայրենիք է վերադարձել միայն 1990-ական թվականներին: Միխայ Առաջինին դիմավորել են ծափահարություններով և «Միխա՛յ, դու մեր թագավորն ես» վանկարկումներով:
Ինչ վերաբերում է միապետի հուղարկավորության արարողությանը, ապա դրան ներկա են եղել Շվեդիայի թագավոր Կառլ 16-րդն ու թագուհի Սիլվիան, Իսպանիայի նախկին միապետ Խուան Կառլոսն ու թագուհի Սոֆիան, Լյուքսեմբուրգի մեծ դուքս Հենրին, Բելգիայի արքայազն Լորենցն ու արքայադուստր Աստրիդը, Մեծ Բրիտանիայի արքայազն Չարլզն ու Քորնուելի դքսուհի Կամիլան ու արիստոկրատիայի այլ բարձրաստիճան ներկայացուցիչներ:
Բացի այդ, իրենց թագավորին վերջին հրաժեշտը տալու են եկել հազարավոր շարքային քաղաքացիներ, որոնց մի մասը, չկարողանալով զսպել հուզմունքը, արտասվել է:
Միապետի դին դրվել է այն տաճարում, որտեղ Միխայ Առաջինը հանդիսավոր կերպով թագադրվել է: Հայտնի է, որ հանգուցյալը թագավոր է դարձել 5 տարեկանում, երբ հայրը՝ Քերոլ 2-րդը, հանուն սիրուհու հրաժարվել է գահից:
Նշվում է, որ Միխայ Առաջինը հուղարակավորվելու է ռումինական Կուրտեա դե Արգես քաղաքում, որտեղ հանգչում է նրա կինը: