ՀՀԿ-ն վատ լուծում չի գտել. Արարատ Զուրաբյանի համար ակնհայտ է, որ Արմեն Սարգսյանը ՀՀ նախագահ ընտրվելու շատ լուրջ հնարավորություն ունի (տեսանյութ)
Իմանալով Հանրապետականի ընտրելու հնարավորությունները՝ իրենք վատ լուծում չեն գտել. ԱԺ-ում պատասխանելով Tert.am-ի հարցին, թե ինչպես է գնահատում Հայաստանի Հանրապետական կուսակցության կողմից առաջադրված նախագահի պաշտոնում Արմեն Սարգսյանի թեկնածությունը, ասաց «Ծառուկյան» խմբակցության պատգամավոր Արարատ Զուրաբյանը:
«Ես չեմ կարծում, որ ՀՀ փոփոխված Սահմանադրությամբ առաջին անգամ պառլամենտի կողմից ընտրվող նախագահի թեկնածուների մի առատ խումբ ունենք: Շատ չեն մարդիկ, ովքեր, գոնե իմ գնահատմամբ, կհամապատասխանեն այդ պաշտոնը կրելու և դրան ունակ լինելու հնարավորություններին»,-ասաց Զուրաբյանը և նկատեց, թե ՀՀԿ-ն ԱԺ-ում մեծամասնություն ունի ու ակնհայտ է, որ Արմեն Սարգսյանը շատ լուրջ հնարավորություն ունի ընտրվելու ՀՀ նախագահ:
«Նա ունի շատ լուրջ քաղաքական, դիվանագիտական փորձառություն, իսկ բացասականն այն եմ համարում, որ որոշ տարիներ չլինելով ՀՀ-ում՝ նա ինչ-որ չափով կտրված է եղել այն իրողություններից ու այն իրականությունից, որի մեջ մենք ենք ապրում»,-հավելեց Զուրաբյանը:
Նա հայտարարեց՝ սա ամենավատ ընտրությունը չէ, որ կատարել է ՀՀԿ-ն, բացի այդ, վստահ է, որ ընդունելի թեկնածու կլինի:
Հարցին, թե հնարավո՞ր է, որ «Ծառուկյան» խմբակցությունն ըստ այդմ էլ աջակցի նախագահի այս թեկնածուին, Արարատ Զուրաբյանը պատասխանեց, որ այս հարցը դեռ քննարկման առարկա իրենց մոտ չի դարձել:
«Եթե «Ծառուկյան» դաշինքն ունենա այլ թեկնածու, որն ավելի դրական դիտարկվի, կողմ կլինեմ: Շտապելու բան չկա, հետագայում մեր տեսակետները կարտահայտենք»,-ասաց նա։
Նա ընդգծեց, որ խմբակցություններին Սահմանադրությամբ տրված է թեկնածու առաջադրելու հնարավորությունը. «Չբացառենք, որ նման հնարավորություն առկա: Չի եղել նման քննարկում, և միայն քննարկումը կվերհանի մեր որոշումը»:
Հիշեցնենք, սակայն, որ «Բարգավաճ Հայաստան» կուսակցության նախագահ Գագիկ Ծառուկյանը հայտարարել էր, որ նախագահի թեկնածու իրենց դաշինքը չի առաջադրի, որովհետև մեծամասնություն չունեն, որ իրենց թեկնածուն անցնի:
Իսկ թե ըստ նրա՝ ձևականությո՞ւն է արդյոք, որ Արմեն Սարգսյանը դեռ վերջնական պատասխան չի տվել ՀՀԿ-ին ու նախագահ Սարգսյանին, Արարատ Զուրաբյանն արձագանքեց. «Ես այնքան էլ մեծ կարծիքի չեմ Հանրապետականի վերաբերյալ, բայց գոնե այս առումով նրանք, կարծում եմ, Արմեն Սարգսյանի հետ որոշակի խորհրդակցություն անցկացրած կլինեն և պարզած կլինեն, ուստի և այն, որ հայտարարվել է, և Արմեն Սարգսյանի կողմից էլ հերքում չի եղել, արդեն համաձայնության նշան է»:
Հարցին, թե համակարծի՞ք է այն դիտարկմանը, որ Արմեն Սարգսյանը բալանսավորող թև կլինի Արևմուտքի և Եվրասիական միության երկրների միջև, պատգամավորը պատասխանեց, որ Արմեն Սարգսյանի դիվանագիտական գործունեությունը որոշ առումով փակ է եղել, և պարզ չէ, թե նա ինչպիսի դիրքորոշում ունի՝ արևմտամե՞տ է, ռուսամե՞տ է, թե ոչ:
«Հանրապետականը փորձել է գտնել նաև որոշակի կոնսենսուսային թեկնածու, այնպիսին, որ մեծ ինչ-որ բաներ չառաջացնի»,-եզրափակեց նա: