Ստամբուլում ցեղասպանության զոհերի հիշատակին նվիրված միջոցառման ժամանակ ձերբակալված 3 անձիք ազատ են արձակվել
Ստամբուլում նախօրեին Հայոց ցեղասպանության զոհերի հիշատակին նվիրված միջոցառման ժամանակ ձերբակալված 3 անձիք ազատ են արձակվել, հայտնում է Ստամբուլի հայկական պարբերականներից «Ակօսը»:
Հայտնի է դարձել նաև ձերբակալվածների ինքնությունը` ակտիվիստներ Գամզե Յամանը, Ժիյան Թոսունը և Լեման Յուրթսևերը:
Հիշեցնենք, որ միջազային իրավապաշտպան Human Rights Association կազմակերպության ստամբուլյան գրասենյակի կողմից երեկ Ստամբուլի Սուլթանահմեդ թաղամասում Հայոց ցեղասպանության զոհերի հիշատակին նվիրված միջոցառման ժամանակ ակցիայի մասնակիցներից 3-ը ձերբակալվել էին՝ պաստառների վրա «ցեղասպանություն» բառի գրության պատճառով:
Ավելի ուշ հայտնի է դարձել, որ Ստամբուլի նահանգապետարանն արգելք է սահմանել տարբեր հիշատակի միջոցառումների ժամանակ ցեղասպանություն բառի կիրառման հետ կապված: Ոստիկանությունից շեշտել են, որ հիշատակի միջոցառումները կարող են անցկացվել, սակայն առանց «ցեղասպանություն» ու «կոտորած» բառերի կիրառման:
Հայտնի է, որ միջոցառմանը մասնակցել են մի շարք հայ, թուրք, քուրդ, հույն և այլ ազգի ներկայացուցիչ մտավորականներ, ակտիվիստներ, մշակույթի գործիչներ, գիտնականներ և մարդու իրավունքների պաշտպաններ: