ԱՄՆ պետքարտուղարը հաջորդ շաբաթ կմեկնի Փհենյան՝ բանակցություններ վարելու
ԱՄՆ պետքարտուղար Մայք Պոմպեոն հաջորդ շաբաթ պետք է ուղևորվի Հյուսիսային Կորեա՝ բանակցելու ապամիջուկայնացման հարցի շուրջ: Այս մասին հայտնում է INTERFAX.RU-ն՝ վկայակոչելով ամերիկյան աղբյուրները:
Նշվում է, որ այս այցը կարող է դառնալ առաջին հանդիպումը բարձր մակարդակով Սինգապուրում հունիսի 12-ին կայացած երկու երկրի նախագահների գագաթնաժողովից հետո:
Աղբյուրի հաղորդմամբ՝ Պոմպեոն չեղարկել է հուլիսի 6-ին նախատեսված հանդիպումը հնդիկ պաշտոնակցի հետ՝ Փհենյան մեկնելու համար:
Կայանալիք այցի մասին պաշտոնական հայտարարությունը կտարածվի առաջիկա օրերին:
Աղբյուրը հիշեցնում է, որ Պոմպեոն նախկինում արդեն երկու անգամ եղել է Փհենյանում: