«Քաղաքակրթական կարևորագույն խնդիր է, երբ տեսում ես ռեստորան է՝ ոսկեջրած աթոռներով, բայց երբ զուգարան ես ներս մտնում, թվում է, թե աղետյալ շրջանում ես»
Կառավարության նիստից հետո տեղի ունեցած ճեպազրույցների ժամանակ վարչապետ Նիկոլ Փաշինյանը խոսեց 2018-2019 թվականների ձեռքբերումների մասին՝ նշելով, որ իրենց օրակարգում տեղ գտած բոլոր կարճաժամկետ խնդիրները այդ տարիների ընթացքում լուծում են ստացել: Վարչապետը նաև հավելեց, որ 2020 թվականը պետք է լինի ռազմավարական խնդիրների լուծման ժամանակաշրջան:
Նիկոլ Փաշինյանն անդրադարձավ նաև տոնական միջոցառումներին և նշեց, որ 2020 թվականը զբոսաշջության առումով ավելի լավ տարի է լինելու.
«Ես կարծում եմ, որ տարին բավականին լավ ենք սկսել և, ըստ էության, այն նորացված հայեցակարգը, որը մենք առաջարկել էինք ՀՀ քաղաքացիներին, արդարացրել է իրեն: Ամանորյա օրերից սկսած մինչ այժմ, զբոսաշրջիկների թիվը բավական շատ է Երևանում, և վիզուալ պատկերը այդպիսին է, քանի որ դրանում մեծ նշանակություն ունեցան այն որոշումները, որոնք մենք կայացրեցինք Հանրապետության հրապարակում՝ ամանորյա տոնակատարությունների հետ կապված»:
Վարչապետը նշեց, որ զբոսաշջության զարգացման համար կան կոնկրետ ազդակներ, և շուտով կսկսվեն բյուջետային ավիաընկերությունների չվերթները, և մյուս շաբաթ արդեն Ryanair ընկերությունը կիրականացնի իր առաջին չվերթը.
«Միջազգային հեղինակավոր լրատվամիջոցները իրենց լսարանին խորհուրդ են տալիս Հայաստանն ընտրել որպես 2020 թվականի հիմնական զբոսաշրջային ուղղություն: Այս ամենը շատ լավ է, բայց ես ուզում եմ ընդգծել նաև, որ այս ոլորտում դեռ շատ անելիքներ ունենք, մասնավորապես՝ սպասարկման մակարդակը բարձրացնելու և սպասարկամ որակի հարցը լուծելու առումով»:
Փաշինյանն անդրադարձավ նաև այն խնդիրներին, որոնց կարող են բախվել զբոսաշրջիկները. «Կարծում եմ գաղտնիք բացահայտած չեմ լինի, եթե ասեմ, որ ՀՀ-ում ամենամեծ խնդիրներից մեկը վերաբերում է զուգարաններին: Սա քաղաքակրթական կարևորագույն խնդիր է, երբ տեսում ես՝ որևէ տեղ բացված է 5 հարկանի ռեստորան՝ ոսկեջրած աթոռներով, բայց հենց բացում ես զուգարանի դուռն ու ներս մտնում, թվում է, թե աղետյալ շրջանում ես գտնվում»:
The post «Քաղաքակրթական կարևորագույն խնդիր է, երբ տեսում ես ռեստորան է՝ ոսկեջրած աթոռներով, բայց երբ զուգարան ես ներս մտնում, թվում է, թե աղետյալ շրջանում ես» appeared first on ԳԱԼԱ.