2019 թվականին ՊԵԿ-ում պարգևավճարներն ավելացել են 800 միլիոն դրամով և կազմել 5.8 միլիարդ դրամ. 967 հոգի էլ ազատվել է աշխատանքից. Դավիթ Անանյան
ՊԵԿ-ում 2019 թվականին պարգևավճարներն ավելացել են 800 մլն դրամով, միևնույն ժամանակ 967 հոգի ազատվել է աշխատանքից՝ մի մասը սեփական դիմումի համաձայն, մի մասը՝ կրճատումների արդյունքում: Այս մասին այսօր կայացած՝ 2019 թվականի արդյունքների ամփոփիչ մամուլի ասուլիսին ասաց ՀՀ պետական եկամուտների կոմիտեի նախագահ Դավիթ Անանյանը:
2019 թվականին ՊԵԿ-ում պարգևավճարները կազմել են 5.8 մլրդ դրամ՝ նախորդ տարվա 5 մլրդ դրամի փոխարեն: Այս ավելացումը, կոմիտեի նախագահի խոսքով, հանրության շրջանում ընդգծված սուր քննադատության առիթ չդարձավ զուտ այն պատճառով, որ հանրությունը մի փոքր հասկացել է կառավարության որդեգրած քաղաքականությունը։
«Մենք հանրության հետ երկխոսելու և մարդկանց որոշակի մտքեր հայտնելու անհրաժեշտություն ունեինք։ Հանրության շրջանում բարձր եկամուտ ունեցողի նկատմամբ կա որոշակի վերապահում. դա լավ ճանապարհ չի, և լավ տեղ չի տանում։ Մենք կարողացանք հասնել նրան, որ եթե ուզում ենք ունենալ պրոֆեսիոնալ անձնակազմ, ապա մասնավոր հատվածի միևնույն մասնագիտության մեջ որոշակի ֆինանսական մրցակցություն պետք է կարողանանք ապահովել»,- ասաց ՊԵԿ նախագահը ։
Ինչ վերաբերում է հարկային մարմնում պարգևավճարներին՝ ՊԵԿ նախագահն ասաց, որ խնդիր է դրվել որոշակի արժանապատիվ վաստակի չափ ապահովել աշխատակիցների համար, որպեսզի որակյալ մասնագետների արտահոսք չլինի։
«Կադրերի արտահոսք եղել է, 2019 թվականին 967 հոգի ազատվել է աշխատանքից, մի մասը՝ սեփական դիմումի համաձայն, մի մասը՝ կրճատումների արդյունքում։ Հաշվետու տարում մեր կադրերը համալրել ենք 600 աշխատակցով։ Սերնդափոխություն կարողացել ենք անել, բայց դրա հետ մեկտեղ, ցավոք, ունեցել ենք փորձառու աշխատողներից ազատման դիմում, որոնք աշխատանքի են ացնել մասնավոր հատվածում», - ասաց Դավիթ Անանյանը: