Թուրքիայում կորոնավիրուսի զոhերի թիվը հասել է 3841-ի
Թուրքիայում վերջին օրվա ընթացքում գրանցվել է կորոնավիրուսով վարակման 1114, մահվան 55 նոր դեպք: Վարակման դեպքերի ընդհանուր թիվը հասել է 139 771-ի, մահվան դեպքերինը` 3841-ի: Այս մասին տեղեկացնում է NTV հեռուստաընկերության կայքը` հղում տալով երկրի առողջապահության նախարար Ֆահրեթին Քոջային:
Օրվա ընթացքում Թուրքիայում անցկացվել է 32 722 թեստավորում, համաճարակի սկզբից երկրում անցկացված թեստավորումների թիվը 1 403 320 է: Առողջացել և հիվանդանոցներից դուրս է գրվել ևս 3089 վարակված, կորոնավիրուսից առողջացած մարդկանց թիվը 95 780 է:
Նոր տեսակի կորոնավիրուսով վարակվածների թիվն ամբողջ աշխարհում 4 256 076 է, մահացել է 287 336 մարդ: Առողջապահության համաշխարհային կազմակերպությունը կորոնավիրուսի համավարակ է հայտարարել մարտի 11-ին: Վիրուսը տարածվել է 212 երկրում: Համաճարակի բռնկման մասին Չինաստանի իշխանություններն ԱՀԿ-ին հայտնել են դեկտեմբերի 31-ին: