Twitter-ը սպառնում է դատի տալ Meta-ին՝ Threads սոցցանցի գործարկման պատճառով. Semafor
Twitter ընկերությունը Meta-ին (նախկինում՝ Facebook) մեղադրել է իր նախկին աշխատակիցներին իր կողմը քաշելու և նրանց միջոցով Twitter-ին համարժեք սոցցանցը՝ Threads-ը մշակելու համար։ Այժմ Twitter-ը սպառնում է Meta-ին դատի տալ: Այս մասին հայտնում է Semafor պորտալը։
Ըստ հրապարակման՝ Twitter-ի խոսնակ Ալեքս Սպիրոն նամակ է ուղարկել Meta-ի գործադիր տնօրեն Մարկ Ցուկերբերգին։ Դրանում նա Meta-ին մեղադրել է Twitter-ի առևտրային գաղտնիքների և այլ մտավոր սեփականության համակարգված յուրացման, ինչպես նաև սոցիալական ցանցի նախկին աշխատակիցներին աշխատանքի վերցնելու համար. խոսքն այն աշխատակիցների մասին է, որոնք ունեն և շարունակում են հասանելիություն ունենալ խիստ զգայուն տեղեկատվությանը:
«Twitter-ը վերապահում է բոլոր իրավունքները, ներառյալ՝ ինչպես քաղաքացիական պաշտպանության, այնպես էլ դատական պաշտպանության միջոցներ հայցելու իրավունքը՝ կանխելու Meta-ի կողմից իր մտավոր սեփականության հետագա պահումը, բացահայտումը կամ օգտագործումը»,- ասվում է նամակում:
Meta-ի անանուն ներկայացուցիչը Semafor-ին ասել է, որ Twitter-ի մեղադրանքներն անհիմն են։ Նրա խոսքով՝ Threads-ի մշակման թիմում Twitter-ի նախկին աշխատակիցներ չկան։
Նախօրեին հաղորդվել էր, որ ամերիկացի ձեռնարկատեր Մարկ Ցուկերբերգի Meta (նախկինում՝ Facebook) ընկերությունը գործարկել է Threads տեքստային հաղորդագրությունների ծառայությունը։ Այն պետք է դառնա գործարար Իլոն Մասկին պատկանող Twitter-ի մրցակիցը։
Հավելվածը գործարկվել է արևմտյան Եվրոպայի ժամանակով կեսգիշերից անմիջապես հետո՝ Apple և Google Android հավելվածների խանութներում ավելի քան 100 երկրներում, այդ թվում՝ ԱՄՆ-ում, Մեծ Բրիտանիայում, Ավստրալիայում, Կանադայում և Ճապոնիայում:
App Store-ում հավելվածի նկարագրությունից հետևում է, որ ծառայությունը նախատեսված է «տեքստի օգտագործմամբ գաղափարների և միտումների փոխանակման համար»:
«Threads-ն այն վայրն է, որտեղ համայնքները հավաքվում են՝ քննարկելու ամեն ինչ՝ սկսած այն թեմաներից, որոնք ձեզ հուզում են այսօր մինչև այն, ինչ վաղը կլինի թրենդային», - ասվում է նկարագրությունում:
Հավելվածի ինտերֆեյսը նման է Twitter-ի ինտերֆեյսին։ Օգտատերերը կկարողանան մուտք գործել նոր կայք իրենց Instagram-ի հաշվի միջոցով։ Փորձագետների կարծիքով՝ Threads-ը կդառնա Twitter-ի գլխավոր մրցակիցը։
Նշվում է նաև, որ Meta-ի կողմից Twitter-ի համարժեք հավելվածի ստեղծումն առաջացրել է Իլոն Մասկի բուռն արձագանքը։ Նոր Threads սոցիալական ցանցի աշխատանքի առաջին չորս ժամում գրանցվել է 5 միլիոն օգտատեր, ասել է Meta-ի համահիմնադիր Մարկ Ցուկերբերգը։