Ռուսաստան-Աֆրիկա երկրորդ գագաթնաժողովը փչացնելու` Արևմուտքի փորձերը ձախողվել են․ Զախարովա
Սանկտ Պետերբուրգում Ռուսաստան-Աֆրիկա երկրորդ գագաթնաժողովը փչացնելու՝ Արևմուտքի փորձերը ձախողվել են, սակայն ինտրիգները կշարունակվեն։ Այս մասին ТАСС-ին տված հարցազրույցում ասել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան՝ Ռուսաստան-Աֆրիկա երկրորդ գագաթնաժողովի շրջանակում։
«Կարող եմ ասել, որ այն, ինչ ծրագրել էին, չկատարվեց: Այն, որ նրանք շարունակելու են կեղտոտ հնարքներ կիրառել մեր երկրի և ամբողջ աշխարհի նկատմամբ, նույնպես ակնհայտ է: Բայց գլոբալ առումով նրանց ջանքերը դատապարտված են լինելու ձախողման»,- պատասխանել է նա:
Ըստ նրա՝ Արևմուտքի գերակայությունը, տնտեսական աճը, բարգավաճումն ամբողջությամբ հիմնված էին այն ռեսուրսների վրա, որոնք ձեռք էին բերվել տարբեր մայրցամաքներից՝ Աֆրիկայից, Ասիայից։ «Ի դեպ, մենք անընդհատ դոնոր ենք եղել և միշտ չէ, որ արդարացի պատասխան ենք ստացել մեր գերազանց վերաբերմունքի համար, հաճախ այդ ամենն ավարտվել է խաբեությամբ, մանիպուլյացիաներով և այլն։ Բայց հիմա այդ դարաշրջանն ավարտվել է»,- ասել է Զախարովան։
ՌԴ ԱԳՆ ներկայացուցիչն ընդգծել է, որ առանց արտաքին ռեսուրսների, Արևմուտքը չի կարող զարգանալ այն արագությամբ, որով սովոր է։
«Բայց զարգացման համար բավարար ներուժ էլ չկա՝ լինի դա գաղափարական, փիլիսոփայական, քաղաքակրթական, տնտեսական, դե ռեսուրսներն էլ բավարար չեն»,- հավելել է նա։