ՔՊ շտաբի միջանցքում եմ եղել, զրուցել ընկերներիս հետ, որևէ օրենք չեմ խախտել․ ԿԲ խորհրդի անդամ Արտակ Մանուկյան
Երևան քաղաքի ավագանու ընտրության օրը քվեարկության ամբողջ ժամանակահատվածում ես չեմ գտնվել «Քաղաքացիական պայմանագիր» կուսակցության շտաբում, այլ քվեարկության ավարտից հետո (23։00-ից հետո) եմ եղել այդ տարածքի միջանցքում, զրուցել ընկերներիս հետ:
Այս մասին Tert.am-ի հետ զրույցում պարզաբանել է ԿԲ խորհրդի անդամ Արտակ Մանուկյանն՝ անդրադառնալով սեպտեմբերի 17-ին իր՝ ՔՊ շտաբում գտնվելուն։
«Հայտնում եմ, որ նմանօրինակ ձևով աշխատանքի ժամից հետո կարող եմ հանդիպել, սրճել և զրուցել իմ ընկերների հետ ցանկացած վայրում»,-նշել է նա։
Մինչդեռ ԿԲ-ի պաշտոնական կայքում կարդում ենք, որ Կենտրոնական բանկի նախագահը, տեղակալները և խորհրդի այլ անդամներն իրենց լիազորությունների իրականացման ժամանակահատվածում չեն կարող լինել որևէ կուսակցության անդամ կամ որևէ այլ կերպ զբաղվել քաղաքական գործունեությամբ։
Արտակ Մանուկյանի պնդմամբ՝ ինքն օրենքի խախտում չի արել։
«Բացում ենք օրենքը, որտեղ նշված է հետևյալը. «Կենտրոնական բանկի նախագահը, տեղակալները և խորհրդի այլ անդամներն իրենց լիազորությունների իրականացման ժամանակահատվածում չեն կարող զբաղեցնել իրենց կարգավիճակով չպայմանավորված պաշտոն պետական կամ տեղական ինքնակառավարման այլ մարմիններում, լինել որևէ կուսակցության անդամ կամ որևէ այլ կերպ զբաղվել քաղաքական գործունեությամբ, զբաղվել ձեռնարկատիրական գործունեությամբ, կատարել վճարովի այլ աշխատանք, բացի գիտական, կրթական և ստեղծագործական աշխատանքից: Հրապարակային ելույթներում նրանք պետք է ցուցաբերեն քաղաքական զսպվածություն»։
Երբևէ չեմ եղել որևէ կուսակցության անդամ, ԿԲ խորհրդի անդամ ընտրվելուց հետո որևէ կերպ չեմ զբաղվել քաղաքական գործունեությամբ և/կամ ձեռնարկատիրական գործունեությամբ: ԿԲ խորհրդի անդամ լինելուց հետո որևէ հրապարակային ելույթում չեմ ցուցաբերել քաղաքական անզսպվածություն: Որպես ՀՀ քաղաքացի և Երևանի ընտրող ունեմ ընտրելու իրավունք, սակայն որևէ կերպ (սոցիալական հարթակ և/կամ այլ տիրույթ) չեմ իրականացրել կամ մասնակցել որևէ քաղաքական թիմին ընտրելու/սատարելու քարոզին»,- մեկնաբանել է ԿԲ խորհրդի անդամը։
Իսկ ինչ վերաբերում է ՔՊ քաղաքապետի թեկնածու Տիգրան Ավինյանին սատարելուն, Արտակ Մանուկյանն ընդգծել է, որ ԿԲ խորհրդի անդամ ընտրվելուց հետո որևէ կերպ, ուղղակի կամ անուղղակի քաղաքական գործընթացների ներգրավված չէ։
Ավելի վաղ Tert.am-ը հարցի առնչությամբ դիմել էր ԿԲ։ Մեզ պարզաբանել էին, որ Կենտրոնական բանկի նախագահի տեղակալի և խորհրդի անդամների՝ Երևանի ավագանու ընտրություններին «Քաղաքացիական պայմանագիր» կուսակցության շտաբում գտնվելու փաստն իրենց անձնական նախաձեռնությունն է, և որևէ առնչություն չունի իրենց աշխատանքային պարտականությունների կատարման հետ։
Հիշեցնենք՝ սեպտեմբերի 17-ին՝ Երևանի ավագանու ընտրությունների երեկոյան, լրատվամիջոցներով տեսանյութ էր շրջանառվում, որտեղ երևում է, որ ԿԲ կառավարման խորհրդի անդամները, մասնավորապես՝ Արտակ Մանուկյանը և ԿԲ նախագահի տեղակալը եղել են «Քաղաքացիական պայմանագիր» կուսակցության շտաբում։