საერთაშორისო პრაქტიკით, მინიმალური რეგულაციებია - კობახიძე პარლამენტში მედიისთვის ახალ წესებზე
"ქართული ოცნების" თავმჯდომარე, ირაკლი კობახიძე ამბობს, რომ პარლამენტში, მედიის ქცევის ახალ წესებზე პარლამენტის თავმჯდომარესთან ერთად იმსჯელეს და "რეალურად, საერთაშორისო პრაქტიკის შესაბამისად, მინიმალური რეგულაციებია დაწესებული".
"თქვენ რომ ნახოთ ნებისმიერ ევროპულ [პარლამენტში] ან თუნდაც კონგრესში რა რეგულაციები მოქმედებს, ამაზე ათჯერ მკაცრი რეგულაციები არსებობს.
ჩვენ არავითარი მკაცრი რეგულაციები არ გვაქვს, არის მინიმალური რეგულაციები დადგენილი, რაღაც ელემენტარული ჩარჩოსთვის, თორემ არავის ეზღუდება არავითარი ფორმით კრიტიკული კითხვის დასმა.
ოთახში რომ არ უნდა შეუვარდე ადამიანს და რომ არ უნდა გაეკიდო ფლიგელიდან ფლიგელში, ეს ნებისმიერი ცივილური ქვეყნის კანონმდებლობითაა მოწესრიგებული".
ჟურნალისტის კითხვაზე, თუ დეპუტატი კითხვებს არ პასუხობს, მაშინ რა უნდა გააკეთონ, კობახიძე პასუხობს: "როგორც ჟურნალისტს აქვს უფლება, ასევე აქვს უფლება პარლამენგტის წევრსაც" და შემდეგ აგრძელებს: "დამერწმუნეთ, ნამყოფი ვარ უამრავ პარლამენტში. მე არ ვიცი არც ერთი ცივილიზებული პარლამენტი, სადაც ჟურნალისტები დეპუტატებს დასდევენ ფლიგელიდან ფლიგელში, უვარდებიან ოთახებში.
საუბარია ელემენტარულ ცივილიზებულ სტანდარტზე. ჯერ კიდევ განვითარების პროცესშია ქართული დემოკრატია და ქართული კულტურა, მათ შორის, პოლიტიკური და მედიაკულტურა. ყველაფერი განვითარდება თანდათანობით. ვიდრე მივაღწევთ ისეთ დონეს, რომ რეგულაციები აღარაა საჭირო, ელემენტარული მინიმალური რეგულაციებით შეიძლება უზრუნველვყოთ ცივილიზებული ურთიერთობები".
კითხვაზე, როდესაც ვიღაც კომენტარზე არ დგება, რა უნდა გააკეთო, კობახიძე პასუხობს: "თქვენ გააშუქებთ, რომ ამაზე პასუხს არ გცემთ დეპუტატი. დეპუტატს თუ არ უნდა კომენტარის გაკეთება, ესაა უარის ცივილიზებული ფორმა, აუცილებელი არაა ფლიგელიდან ფლიგელში გაეკიდოთ...
მე, პირადად მქონდა 50 შემთხვევა, როდესაც ვიდექი აქ [ტრიბუნასთან], ყველა კითხვას გავეცი პასუხი რაც აქ დაისვა და კონკრეტული ჟურნალისტი გამომეკიდა, ფლიგელიდან ფლიგელში დამსდევდა, როცა შეეძლო აქ დაესვა კითხვა და გავცემდი პასუხს".
6 თებერვალს, ბიუროს სხდომაზე პარლამენტის თავმჯდომარემ შალვა პაპუაშვილმა დეპუტატებს თავისი ახალი ბრძანების შინაარსი გააცნო, რომელიც უმაღლეს წარმომადგენლობით ორგანოში მედიის საქმიანობას არეგულირებს.
"როგორც იცით, წლებია, გვქონდა გარკვეული ხარვეზი, არ გვქონდა აკრედიტაციები, ამიტომ ყოველ ჯერზე იყო საშვების დაშვება ჟურნალისტებისთვის. ე.წ. საპარლამენტო ჟურნალისტიკა, ამ მხრივ, არ არსებობდა. ამიტომ პარლამენტის კვლევითმა ცენტრმა შეადგინა ანალიზი სხვადასხვა ქვეყნების გამოცდილების და ამ საუკეთესო გამოცდილებაზე დაყრდნობით შედგა წესი აკრედიტაციის, რომელიც ეფუძნება ორ ძირითად პრინციპს: პირველი არის, რომ ხელი შევუწყოთ მედიას იმისთვის, რომ ყველაფერი, რაც მნიშვნელოვანია, გაშუქდეს და საპარლამენტო საქმიანობა გაშუქდეს; მეორე მხრივ, უზრუნველყოფილი იყოს პარლამენტში სამუშაო გარემო. შესაბამისად, არის წესები, რომლებიც ბრძანების მიღებისთანავე გამოქვეყნდება და დეტალებს შეგიძლიათ გაეცნოთ", - განაცხადა პაპუაშვილმა.
ახალი ბრძანებით, იმ მედიის წარმომადგენლებისთვის, რომლებიც აშუქებენ საპარლამენტო საქმიანობას, განისაზღვრება აკრედიტებული ჟურნალისტების რაოდენობა. ამასთან, შემოიღებენ სპეციალურ, ერთდღიან საშვს არააკრედიტებული ჟურნალისტისთვის.
პარლამენტის ვებსაიტზე გამოქვეყნებული პარლამენტის თავმჯდომარის ბრძანებით, ის წესების დარღვევის შემთხვევაში, ჟურნლისტებზე სანქციების გავრცელებას ითვალისწინებს.
ბრძანების თანახმად, თუ საპარლამენტო ჟურნალისტმა აღნიშნული წესები დაარღვია, მას აპარატის უფროსის გადაწყვეტილებით, შეიძლება, შეუჩერდეს აკრედიტაცია ერთი თვით. დარღვევის განმეორების შემთხვევაში, აკრედიტებულ ჟურნალისტს აკრედიტაცია შეუჩერდება 6 თვით. მისი სხვა ჟურნალისტით ჩანაცვლება დაუშვებელია.
ახალი წესები 1 მარტიდან ამოქმედდება.