Қызылордада жол-көлік инфрақұрылымы қарқынды дамуда
Мемлекет басшысының қолдауымен биылғы жылы Қызылордада ауқымды жобалар қолға алынып, сәтті жүзеге асырылуда.
Ел Президенті Қасым-Жомарт Тоқаев: "Автокөлік жолдары – елдің экономикалық және әлеуметтік тыныс-тіршілігінің күре тамыры. Негізгі қалаларымыз бен аймақтарымыздың арасын сапалы жолдармен жалғау маңызды" деп атап өткен болатын.
Осы мақсатта Қызылорда қаласында тұрғындардың жүріп-тұруына қолайлы жағдай жасау үшін жолдар мен оның айналасын абаттандыруға жақсы мән берілуде.
Биыл қаланың жол-көлік инфрақұрылымын дамытуға 34,8 млрд. теңге бөлінді. Оған 97 көшені салу, қайта жаңғырту, күрделі және орташа жөндеу жұмыстары жүргізілуде. Сондай-ақ, 54 көшеге жаяу жүргінші жолы салынып, 81 көше жарықтандырылуда. Мұнан бөлек, әуежайдан Сұлтан Бейбарыс көшесіне дейінгі аралық, Шиелі ауданынан кіреберіс жол, Яссауи, Жаппасбай батыр көшелері, Тәуелсіздіктің 25 жылдығы даңғылы кеңейтілуде. Ал, алдағы уақытта "ҚазАвтоЖол" ұлттық компаниясы "Қызылорда-Құмкөл" автомобиль жолын қайта жаңғырту көзделіп отыр.
Әуежай жолы мен Шиелі кіреберіс жолдарына кеңейту жұмыстары жүргізіліп жатса, Астанадан кіреберіс Сағымбаев көшесін қайта жаңғырту жоспарланып отыр.
Е.Көшербаев көшесі қайта жаңғыртылып, Н.Назарбаев даңғылынан Тәуелсіздіктің 25 жылдығы даңғылына дейінгі жаңадан жол құрылысы салынды.
Қорқыт ата көшесінен көлік жолайрығына дейінгі бөлікті жаңғырту жұмыстары жүргізілуде. Төрт жолақты жолдың ұзындығы – 3,3 шақырым. Жобада жаяу жүргіншілер жолын және жарықшамдар орнату қарастырылған.
Айта кету керек, өткен жылы Қызылорда қаласында 11 млрд. теңгеге 82 шақырым болатын 267 көше жөндеуден өтті.
Сілтемесіз жаңалық оқисыз ба? Онда Telegram желісінде парақшамызға тіркеліңіз!