Кацарска- Собранието како да го игнорира Уставниот суд
Уставна криза - Нов предизвик откако Уставниот суд ќе остане без уште еден судија
Таа на новинарското прашање дали неизбирањето на судии од Парламентот е некаков вид на политички притисок, рече дека не се согласува.
„Не би рекла дека тоа е политички притисок, туку дека имам чувство како да Собранието да сака го игнорира Уставниот суд, како да не ја знае едноставно улогата на Уставниот суд“ вели Кацарска потенцијаќи дека врз неа не се вршат политички притисоци.
Според неа е несериозно тоа што се дозволува веќе 6 месеци Уставниот суд да работи со една третина помалку од потребните судии. Претходникот на Кацарска, Сали Мурати два месеци пред да истече неговиот мандат писмено го известил претседателот на Собранието Талат Џафери дека им истекува мандатот на тројца судии. Кацарска вели дека во ноември таа писмено го известила Џафери дека на уште еден судија му истекува мандатот на 14 јануари.
„ Се обидувам во непосредни комуникации со министерот за правда, со господинот Џафери да замолам да што поскоро се изберат судии на Уставниот суд. Но, моите ингереции завршуваат тука“ вели Кацарска.
Таа предупреди дека со неизбирањето на нови судии ќе се предизвика дисбаланс меѓу евентуалниот напад врз уставниот поредок и заштитата на истиот од страна на судот.
„Во име на Уставот и неговото бескомпромисно почитување и штитење барам и апелирам до Собранието да се изберат нови уставни судии затоа што во прашање ќе го доведат легитимитетот на идните одлуки, но секако и квалитетот, а особено довербата на граѓаните во Уставниот суд што следствено значи губење на доверба во правниот систем“, нагласи Кацарска.
Оваа состојба веќе се одразува со негативен ефект врз работата на Судот. Изминатиот период беа целосно одложени 11 предмети за кои се чека полн состав. Полн состав чекаат деловникот за работа на Владата, предмети за слободи и права, закон за ЈО, закон за даноци за моторни возила за данокот за конзуларни претставници, закон за процена, одлука за додатокот на пратениците, ДУП Гостивар, закон за облигациски односи, закон за високо образование.
За да има одлука, посочи, потребни се најмалку петмина судии, но никој не може да грантира дека сите петмина ќе бидат едногласни во одлуките, а и не е правило затоа што квалитетните одлуки се засновани врз дебата, различни мислења и толкувања.
Кацарска предупреди дека сериозна ќе биде состојбата доколку судот биде доведен да одлучува во неколку исклучителни ситуации за кои е нужно дво-третинско мнозинство, односно шест судии, тоа е случај за имунитет и одговорност на претседателот на државата и избор на претседател на Уставен суд.
Годинава примени се 148 предмети, а решени се 173 предмети, што значи се работеле и останати предмети од изминатите години