د اوکراین یوې محکمې پخوانی ولسمشر یانوکوویچ په خیانت مجرم وګاڼه
په کیيف کې د اوبولون سیمه ییزې محکمې قاضي ولادیسلاو دیویاتکو د جنورۍ په ۲۴مه وویل چې یانوکوویچ د اوکرایین د ملي امنیت د بنسټ پر وړاندې جنایت کړی دی.
قاضي همدا راز ۶۸ کلن یانوکوویچ د اوکراین پر ضد د جګړې په تمویل کې په لاس لرلو تورن کړ.
د محکمې له حکم سره سم د نوموړي د بند موده هغه مهال پیلېږي چې دی ونیول شي.
یانوکوویچ د ۲۰۱۴ کال په فبرورۍ کې وروسته له هغه د اعتراضونو په نتیجه کې له واکه لېرې کړای شو چې ده له اروپایي اتحادیې سره د یوې مهمې موافقې پلانونه شنډ کړل او ویې ویل چې له مسکو سره نږدې اړیکې پالي.
په هغو اعتراضونو کې د خلکو او امنیتي ځواکونو ترمنځ شخړو کې تر سلو ډېر کسان وژل شوي او ۲۵۰۰ نور ټپیان شول.
د اوکراین پخوانی ولسمشر له واکه تر لېرې کېدو وروسته روسیې ته ولاړ او تراوسه هلته دی.
نوموړي پر ده ټول لګېدلي تورونه رد کړي دي.