ملګري ملتونه: حوثيانو منلې چې له سره سمندرګي خپل ځواکونه په شا کوي
دا بهیر چې نن شنبه پیلېږي، کولی شي چې یمن ته د بشري مرستو د رسولو نوې لارې پرانیزي، چېرې چې له قطحۍ د میلونونو انسانانو د ژغورنې لپاره مرستو ته سخته اړتیا ده.
د دې ژمنې له مخې حوثي یاغیان وايي، دوی به په لوېدیځ ساحل کې د سره سمندرګي له حدیده، صالیف او راس عیسی بندرونو څخه خپل ځواکونه وباسي.
د ملګرو ملتونو د بیا ځای پر ځای کولو د همغږۍ د کمېټې مشر دا توافق د ډیسمبر په میاشت کې په ستاکهولم کې له جوړجاړي راوروسته په سیمه کې لومړنی عملي ګام بللی دی.
د دې جوړ جاړي له مخې په لومړنۍ بیا ځای پر ځای کېدنه کې حکومتي ځواکونه هم باید د حدیده په څنډو کې له خپلو پوستو په شاه شي، ورپسې به په دوهم پړاو کې داوړه غاړې خپل ځواکونه نور هم شاته بیايي.
خو د ملګرو ملتونو په ننني بیان کې د حکومت پلوو ځواکونو د په شا کېدو په اړه څه نه دي ویل شوي.
په یمن کې له څو کلونو راهېسې د ایران ملاتړ لرونکي حوثي یاغیان د هغه حکومت خلاف جنګېږي چې نړیواله ټولنه یې د یمن د حکومت په توګه په رسمیت پېژني او د سعودي په مشرۍ سیمه ییز ائتلاف یې نظامي ملاتړ کوي.
دې کورنۍ جګړې د یمن خلک له لوږې او قحطۍ سره مخ کړي.