په خوست ښار کې تېره ورځ چاودنې ۲ تنه ووژل او ۲۸ نور ټپیان شول
د خوست امنیتي چارواکي وايي، چاودېدونکي توکي په یوه موټرسایکل کې ځای پر ځای شوي وو او هر کله چې له سیمې د ولایتي قواوو پوځي ګاډي تېرېدل، د ریموټ کنټرول په واسطه پسې چاودنه وشوه.
د خوست د عامې روغتیا رئیس ډاکتر حبیب شاه انصاري ازادي راډیو ته وویل چې په دې چاودنه کې ۲۸ تنه ټپیان شوي او د یوې ښځې په ګډون ۲ تنه وژل شوي دي.
ښاغلي انصاري زیاته کړه چې په ټپیانو کې د ۳ تنو روغتیايي حالت نازک دی.
د ده په وینا چې د پېښې ټپیان د ښار نږدې روغتونونو ته لېږدول شوي دي.
تر اوسه کومې وسله والې ډلې د یادې پېښې په اړه رسنیو ته څه نه دي ویلي.