راپورونه: پاکستان د ملا اختر محمد منصور پانګه کنګل کړې
دا خبر بي بي سي او افغانستان ټایمز د پاکستان د پلټنو د فدرالي ادارې په حواله خپور کړی دی.
خو ازادي راډیو د دې ادارې پر رسمي ویبپاڼه داسې معلومات ونه موندل.
په دې خبر کې د پاکستاني چارواکو په حواله ویل شوي چې ملا اختر محمد منصور په کراچۍ ښار کې د ځمکو او کورونو کاروبار (د رهنمای معاملات) کار کاوه او ډېر ملکیتونه یې هم درلودل.
د دې ادارې په حواله همدا راز ویل شوي چې ملا اختر محمد منصور په دوو نورو نومونو د پاکستان جعلي شناخت کارډونه او بانکي حسابونه هم جوړ کړي وو.
د وسله والو طالبانو یوه ویاند ذبیح الله مجاهد پر ټولنیزو رسنیو په یوه پيغام کې دا خبر ناسم بللی دی.
ملا اختر محمد منصور تقریباً درې کاله مخکې د پاکستان په بلوچستان ایالت کې د بې پيلوټه الوتکې په حمله کې ووژل شو.
پاکستاني چارواکو ویلي چې د اختر محمد منصور د جایدادونو په اړه څېړنې یې د هغه پاسپورټ پر اساس کړي چې د اختر محمد منصور له مړي سره موندل شوی و.
د افغانستان حکومت هم تر اوسه رسماً په دې اړه څه نه دي ویلي.