Aluştadaki «Hizb ut-Tahrir davasınıñ» mabüslerini bir künge aşsız qaldırğanlar – advokat
«Davanıñ eki mabüsi Kantemirov ve Halilov mahkeme oturışuvında aşnen temin etilmedi, olarnı saba saat 7-de qavaltıdan evel SİZOdan çıqarğanlar, SİZOğa aqşam yemeginden soñ qaytqanlar, yani olar bir kün aç ediler, olarnı üyle ve aqşam yemegi aqqından marum ettiler», – dep ayttı Azamatov.
Advokatnıñ aytqanına köre, mahkeme SİZOğa qarşı qarar çıqardı. Aynı vaqıtta, imayeniñ bütün muracaatlarını red etti. Tek aş berüvnen bağlı muracaat qanaatlendirildi.
«Mahkeme SİZOda tutulğan şahıslarğa aş bermek içün maliye sermiyasınıñ qullanuvınen bağlı teşkerüv keçirilmesi ve aş bermegen qabaatlılarnıñ mesüliyetke çekilmesi içün qarar çıqardı. Bu qarar belli organlarğa yollanılacaq», – dep añlattı advokat.
Fevralniñ 3-nde Rusiye kontrolindeki Aqmescitniñ Kiyev rayon mahkemesi Aluştadaki «Hizb ut-Tahrir davası» mabüsleriniñ apis müddetini uzattı.
Rusiye quvetçileri qırımlılarnı iyünniñ 10-nda olğan tintüvlerden soñ tutıp aldı. Rusiye FSBsi tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) aıçlğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.