Барлык медицина хезмәткәрләре Covid-19 белән эшләүче табиблар кебек сакланырга тиеш
(Казан, 19 май, «Татар-информ», Марат Ишкилдин). Татарстанда барлык медицина хезмәткәрләре эш урынында Covid-19 инфекцияле коронавирус белән эшләүчеләр дәрәҗәсендә үзләрен саклау өчен кирәкле чараларны күрергә тиеш. Бүген бу хакта Татарстан Республикасы Президенты Рөстәм Миңнеханов «Татарстан 24» телеканалы эфирында әйтте.
«Без һәр очракны игътибар белән күзәтәбез. Аның каян килеп чыкканлыгын, бигрәк тә медицина учреждениеләрендә түгелме икәнлеген карыйбыз», - дип искәртте ул.
Хәзер хастаханәгә үзенең коронавирус инфекциясе белән зарарланганын белмәгән пациент та килергә мөмкин. «Хәтта беренче тестлар да тискәре булырга мөмкин», - диде республика җитәкчесе.
Үзенең Instagram-аккаунтында ТР Президенты республика медицина учреждениеләрендә гражданнар сәламәтлеге өчен көрәшүче табиблар турында даими постлар бастыра.