(Казан, 2 июнь, «Татар-информ). Россия Президенты Владимир Путинның сүзләренчә, ана капиталын куллануга барлык чикләүләр акчаны тиешсез максатта файдалануга юл куймау белән бәйле. Бу турыда РИА Новости хәбәр итә. Путинның «Бердәм Россия» җитәкчелеге һәм праймериз җиңүчеләре белән очрашуында «Аналар советы» рәисе Татьяна Буцкая ана капиталын фатир ремонтына тотарга рөхсәт итәргә тәкъдим итте. «Ана капиталын түләү белән бәйле барлык чикләүләр кешеләр дәүләт бүлеп бирә торган әлеге акчадан тулысынча һәм әһәмиятле юнәлешләрдә куллана алсын өчен кертелде. Алар тиешсез максатларда кулланмауны һәм манипуляция мөмкинлекләрен чикләү белән бәйле», — диде Путин. «Ә ремонт турында уйларга мөмкин, әмма критерийлар гына һәрвакыт ачык түгел. Нинди ремонт, нигә ул элек эшләнмәгән, бу акча бушка китмәячәкме? Аңлыйсызмы, бу ремонт эшләре, барлык төзелеш эшләре кебек үк, анда да шулкадәр төрле манипуляцияләр, бу ремонтка акча җитәрме, билгесез. Ремонтны башларга була, әмма тәмамлап булмый, аны бары тик туктатып кына була. Шуңа күрә монда игътибарлы булырга кирәк. Әлеге акчадан файдалануның нәтиҗәлелеге турындагы идеяләргә ихтыяҗ булачак», — дип өстәде ул.