Әлмәт балалар поликлиникасы мөдире һәм 18 табиб коронавирустан прививка ясатты
(Әлмәт, 4 июнь, «Татар-информ», « Әлмәт таңнары »). Перинаталь үзәкле Әлмәт балалар хастаханәсе поликлиникасы мөдире, 18 табиб һәм шәфкать туташы Covid-19 инфекциясеннән прививка ясатты. Бу хакта туры эфир вакытында Татарстан Әлмәт районы башлыгы Тимур Нагуманов хәбәр итте.
«Вакцинация йогышнлы авыруны җиңел формада кичерергә, авыруның катлаулы формаларын булдырмаска мөмкинлек бирә», — диде Нагуманов.
Үрнәк итеп ул балалар поликлиникасы мөдире Тамара Черемисинаны, шулай ук аның командасын — 18 табиб һәм шәфкать туташы китерде. Алар коронавирустан прививка ясатканнар.
«Гадәттә, кешеләр шикләнә, сораулары туа: „Мин прививкадан куркам, миңа ышанычлы мисаллар күрсәтегез“, диләр. Менә бер мисал — Тамара Федоровна Черемисина, ул танылган табиблар династиясен дәвам итүче, поликлиника мөдире. Күпме бала аның куллары аша үтеп, дәва алган. Шикләнмәгез. Мәҗбүри рәвештә прививка ясатырга кирәк. Зинһар, прививка ясатыгыз», — дип өндәде Нагуманов.