(Казан, 14 сентябрь, «Татар-информ»). Татарстан Президенты Рөстәм Миңнеханов эш сәфәре белән Чаллыга килде. Ул «М.Ш.Бибишев исемендәге „Витязь“ Олимпия резервы спорт мәктәбе»нең капиталь төзекләндерелгән «Дулкын» бассейнын да карады. Бу хакта республика башлыгының матбугат хезмәте җитәкчесе Лилия Галимова хәбәр итә. Әлеге объект капиталь төзекләндерүдән соң быел августта тапшырылды. Алты йөзү юлы булган бассейнның озынлыгы 25 метр, тирәнлеге 1,6 метрдан 5 метрга кадәр. 24 метрга 11 метр зурлыгындагы уен залы бар. Шулай ук душ һәм тернәкләндерү үзәге булган ике зур киенү-чишенү бүлмәсе ясалган. Бина керамогранит белән тышланган, бизәү эшләре башкарылган, яңа ишекләр, тәрәзәләр һәм витражлар урнаштырылган, барлык инженер системалары алыштырылган.
