Миңнеханов 13 кешегә «Татарстанның атказанган авыл хуҗалыгы хезмәткәре» исемен бирде
Татарстан Рәисе Рөстәм Миңнеханов 13 кешегә «Татарстан Республикасының атказанган авыл хуҗалыгы хезмәткәре» исемен бирде. Бу хактагы карар хокукый мәгълүмат порталында чыкты.
«Республиканың агросәнәгать комплексын үстерүгә керткән өлеше һәм күпьеллык намуслы хезмәте өчен», диелә документта.
Бүләкләнүчеләр арасында Россия авыл хуҗалыгы үзәгенең Татарстан филиалының Лениногорск районы бүлеге җитәкчесе Марат Ганиев, Татарстан Авыл хуҗалыгы һәм азык-төлек министрлыгының шул ук исемдәге Актаныш районы идарәсе җитәкчесе Нәфисә Сәлимгәрәева һәм башкалар бар.