Малайзиядә Татарстан Республикасы мәдәнияте көннәре уза
Шушы көннәрдә Куала-Лумпурда рәсми рәвештә Татарстан Республикасы мәдәнияте көннәре башланып китте. Бу хакта Татарстан Мәдәният министрлыгы хәбәр итә.
Мәдәният көннәрен ачу тантанасында Татарстан Республикасы мәдәният министры Ирада Әюпова, Россиянең Малайзиядәге Гадәттән тыш һәм Тулы вәкаләтле илчесе Наил Латыйпов, перспективалы Ислам тикшеренүләре халыкара институты рәисе доктор Масли бин Малик, Селангорның хатын-кызлар үсеше һәм социаль тәэмин итү мәсьәләләре буенча башкарма киңәшчесе Ян Берхормат Пуан Анфаал Бин Саари катнашты.
Мәдәният көннәре кысаларында Куала-Лумпурда «Алтын минбәр» XX Халыкара мөселман киносы фестивале кино күрсәтүләре уза. Татарстан киносы тәкъдим ителәчәк киләсе шәһәр Джохор булачак.
«Ике илнең рәссам, кинематографистларын һәм мәдәният өлкәсендәге экспертларын берләштереп, «Алтын минбәр» фестивале хезмәттәшлек һәм үзара белем алышу өчен мөмкинлекләр тудыра. Малайзия хөкүмәтенең фестивальне хуплавы аның мәдәни төрлелекне алга этәрү һәм халыкара партнерлар белән уңай мөнәсәбәтләрне ныгытуга тугрылыгын ассызыклый. Бу фестиваль Малайзия халкына Татарстан һәм Россиянең бай мәдәни мирасы белән танышу өчен уникаль мөмкинлек булдыра», - диелә Малайзиянең әйдәп баручы Harapan Daily басмасында.
Татарстан Республикасы мәдәнияте көннәренең рәсми чаралары кысаларында мәдәният министры Ирада Әюпова Селангор штатындагы дәүләт китапханәсе эшчәнлеге һәм фондлары белән танышты, шулай ук Куала-Лумпур шәһәре Ислам сәнгате музеенда булды.
Искәртик, быел – Россиянең барлык китапханәчеләре өчен бик истәлекле ел. Казан Россиянең китапханә башкаласы, ә Татарстан 2024 елда иң күп укучы төбәк дип танылды. Казанда «Күпполяр дөньяда китапханә» Бөтенроссия китапханә конгрессы һәм «Россия әдәби флагманы» зур масштаблы фестиваль-форумы узды.