Тошкентнинг уч туманида мактаблар онлайнга ўтказилади. 1 апрелдан оммавий тадбирлар тақиқланиши мумкин
Коронавирусга қарши кураш бўйича Тошкент шаҳар штабининг билдиришича, мазкур қарор коронавирус инфекцияси янги штаммлари кенг тарқалишини олдини олиш мақсадида қабул қилинган.
Ушбу туманларда фаолият олиб бораётган нодавлат ва хусусий таълим ташкилотларига ҳам 16 мартдан бошлаб ўқув режасида белгиланган таътилга қадар онлайн ўқитиш режимига ўтиш тавсия қилинди.
Бундан ташқари Тошкент шаҳар штаби 1 апрелдан бошлаб Тошкент шаҳрида оммавий тадбирларни вақтинча тўхтатиш бўйича таклиф киритди.
Штаб йиғилишида пойтахтда тўй, марака ва маросимларни ўтказишда ҳам Республика махсус комиссияси қарорлари билан белгиланган тартиб-қоидалар ва карантин талаблари, санитария-гигиена қоидаларига қатъий риоя этилиши бўйича назоратни қатъийлаштириш белгиланди.
Шунингдек, ️ Тошкент шаҳар ҳокимлиги ўз тизимида йиғилишлар ва мажлислар ўтказишни вақтинчалик чеклади.
Аввалроқ Тошкент шаҳрида бир неча кун ичида коронавирусга чалинганлар сони кескин кўпайгани маълум қилинган эди. Жумладан, Тошкент шаҳрида 9 март куни 11 бемор аниқланган эди.
10 март куни эса уларнинг сони кескин кўпайиб 71 кишини ташкил қилганди. 14 март куни эса Ўзбекистон бўйича аниқланган 111 беморнинг 93 нафари пойтахт Тошкентда экани хабар қилинган.