ЖССТ COVID-19ни даволаш учун яна битта дорини тасдиқлади

Жаҳон соғлиқни сақлаш ташкилоти (ЖССТ) моноклонал антитаначаларга тегишли бўлган тоцилизумабни коронавирус билан касалланган беморларни даволаш учун тавсия этилган дорилар рўйхатига киритди. Бу ЖССТ томонидан COVID-19 га қарши курашиш учун тасдиқланган олтинчи доридир, дея хабар беради БМТ.

Ушбу олтита маҳсулотдан учтаси Roche томонидан ишлаб чиқарилади. ЖССТ фармацевтика компаниялари томонидан юборилган аризалар сони ортиб боришига, рақобат эса нархларни пасайтиришга имкон беришига умид қилмоқда. Оғир ёки жиддий CОVID-19 билан касалланган беморларда иммунитет тизимининг ҳаддан ташқари реакцияси кўпинча соғликка жиддий зарар етказиши мумкин. Бундай ортиқча иммун жавоб интерлейкин-6 ингибиторлари, шу жумладан тоцилизумаб томонидан бостирилади.

Стандарт даволаш режими билан солиштирганда, ушбу дори-дармонларни оғир ёки жиддий касалликка чалинган беморларда қўллаш ўлим эҳтимолини 13 фоизга камайтиради.

Шундай қилиб, тадқиқот маълумотларига кўра, тоцилизумабни томир ичига юбориш оғир касалликларда самарали бўлади ва бундай беморларни кислород билан таъминлаш, кортикостероидлар ва бошқа дорилар билан даволаш учун тавсия этилади.

Тоцилизумаб учун патент муддати тугаган, шунинг учун ушбу махсус интерлейкин-6 блокерини ишлаб чиқариш интеллектуал мулк ҳуқуқлари билан чекланмайди. Бироқ, ҳозирги вақтда дори қиммат – ҳар бир дозаси 500-600 доллар туради ва жаҳон фармацевтика бозорида унинг таъминоти чекланган. Жаҳон соғлиқни сақлаш ташкилоти унинг тавсиялари талабнинг ошишига олиб келади ва бошқа компаниялар тоцилизумаб ишлаб чиқаришни бошлайди, бу эса унинг нархини пасайтиради.