GRECO. ՀՀ կառավարությանն անհրաժեշտ է ավելի ուժեղ հաշվետվողականություն
GRECO-ն այսօր հրապարակել է զեկույց, որում Հայաստանին կոչ է անում շարունակել ջանքերը` կանխելու կոռուպցիան բարձրագույն գործադիր գործառույթներ ունեցող անձանց եւ ոստիկանության շրջանում:
GRECO-ն նշում է՝ անհարկի ազդեցության ռիսկերը կանխելու համար Հայաստանի կառավարությանն անհրաժեշտ է հաշվետվողականության ավելի ուժեղ համակարգ։
«Բարձր մակարդակի կոռուպցիոն դեպքերի եւ նախորդ ռեժիմների հետ կապ ունեցող կլեպտոկրատական ցանցերի նկատմամբ քրեական հետապնդում իրականացնելու համար մի շարք լայնածավալ հետաքննություններ են ընթանում, սակայն մինչ օրս դատավճիռ չի կայացվել»,- ասված է զեկույցում:
Ինչ վերաբերում է ոստիկանությանը, GRECO-ն նշում է, որ «այն չունի էթիկայի լավ զարգացած ենթակառուցվածք. այն չունի ոչ հատուկ հակակոռուպցիոն քաղաքականություն/ռազմավարություն, ոչ էլ սեփական վարքագծի կանոնագիրք եւ առ այսօր չի իրականացվել ռիսկերի գնահատում»: