«Кетердәп торачак» – бәрәңге кыздыру өчен киңәшләр

Бәрәңгене кыздырып бетерер алдыннан гына тозларга кирәк. Идеаль кыздырылган бәрәңге өчен 3 шеф-кулинар киңәше «АиФ» сайтында чыкты.

Әгәр табиблар һәм нутрициологлар киңәшләренә каршы килеп, кыздырылган бәрәңге ашыйсыз икән – аны бары тик алтынсу һәм кетердәп тора торган итеп әзерләргә кирәк. Моңа ирешү, тәмне баету һәм бәрәңгене матур итеп кыздыру өчен берничә гади кагыйдәне үтәү җитә.

«Башта киң таралган мифны юкка чыгарыйк: бәрәңгене кыздыру алдыннан суга салып тору кирәк түгел. Күпләр, шуңа күрә крахмал юыла, дип язалар. Ә крахмалдан котылу – хата, ул бәрәңгегә аның үзенә генә хас булган ачык тәм бирә. Шуңа күрә суга салып торуның кирәге юк.

Мин суда чылатып торуны бары тик крахмалы артык күп булган сортларга гына кулланыр идем, ләкин андый бәрәңге бездә сирәк очрый. Шуңа күрә без аның кабыгын әрчеп, саламлап кына турап алабыз», – ди кулинар.

Кагыйдә №1. Яхшы итеп юарга

Бәрәңгене әрчү алдыннан яхшылап юарга, аннары, әрчеп, саламлап яки телемләп турарга кирәк.

Кагыйдә №2. Киптерү

Бәрәңгене кыздыру алдыннан яхшы итеп киптерү бик мөһим. Аны тигез өслеккә җәеп куегыз һәм бераз көтегез. Кәгазь яки тукыма сөлге белән дә киптереп алырга була. Яхшы киптерелгән бәрәңге дөрес кыза. Әгәр телемнәр өстендә күп сок булса, алар кыздырганда су чыгарачак.

Киптерүне озакка сузмагыз – 15 минут җитә, бәрәңге каралырга да өлгерми.

Кагыйдә №3. Тоз

Иң мөһиме: бәрәңгене бары тик кыздыру ахырында гына тозларга кирәк. Әгәр башында яки уртасында тоз салсагыз, ул бәрәңгедән дымны тартып чыгара, бу артык сыеклык кыздыру процессын бозачак: бәрәңге кыздырылудан бигрәк пешә башлаячак.

Ә менә борыч һәм башка тәмләткечләрне башта ук өстәргә була – алар мондый эффект бирми.

Димәк, бәрәңгене кыздыру алдыннан киптерү һәм тозны ахырда өстәү – кетердәп торган бәрәңге ашауның иң мөһим серләре.