Վրացի փորձագետ. Աֆգան Մուխթարլի առևանգումը հիմար դրության մեջ է դրել Վրաստանի իշխանություններին
Արմինֆո.Ադրբեջանցի լրագրող Աֆգան Մուխթարլիի առևանգումը և Ադրբեջան տեղափոխելը հիմար դրության մեջ է դրել Վրաստանի իշխանություններին: Կարծում եմ, որ մեր իշխանությունները ծուղակն են ընկել: ԱրմԻնֆո-ին այդպիսի կարծիք է հայտնել Բաթումի պետական համալսարանի փիլիսոփայության դեպարտամենտի դոցենտ Գիորգի Մասալկինը:
Ադրբեջանի ղեկավարության հասցեին իր քննադատությամբ հայտնի Աֆգան Մուխթարլին, ադրբեջանական իշխանությունների հետապնդումներից զգուշանալով, վերջին տարիներին իր ընտանիքի հետ միասին բնակվում էր Թբիլիսիում, որտեղից մայիսի վերջին առևանգվել և տեղափոխվել է Բաքու: Մայիսի 30-ին Մուխթարլիին մեղադրանք է առաջադրվել Ադրբեջանի ՔՕ 318.1 (պետական սահմանի ապօրինի հատում), 206.1 (մաքսանենգություն) և 315.2 (իշխանության ներկայացուցչին դիմադրություն ցույց տալ) հոդվածներով: Նրան սպառնում է մինչև 15 տարի ազատազրկում:
«Ինձ համար դժվար է պատկերացնել, թե ինչն է ավելի վատ՝ այն, որ մենք թույլ տվեցինք օրը ցերեկով Թբիլիսիի կենտրոնում օտարերկրյա լրագրողի առևանգումը, թե Բաքու նրա տեղափոխմանը մեր իշխանությունների մեղսակցությունը: Թե մեկը, թե մյուսը Վրաստանի համար մինուս է՝ հատկապես մարդու տեղաշարժի ազատության և իրավունքների զարգացման առումով:
Մասալկինը նշել է Վրաստանի իշխանությունների կողմից ադրբեջանցի գործընկերներին մարդու առևանգման մեջ մեղադրելու, Թբիլիսիի՝ Բաքվին հասցեագրված պաշտոնական բողոքի նոտայի անհրաժեշտությունը: Ըստ նրա, դա ինչ-որ կերպ թույլ կտար Վրաստանի ղեկավարությանը դուրս գալ այդ ամոթալի դրությունից:
Հունիսի 15-ին Եվրախորհրդարանն ընդունել է բանաձև, որով կոչ է արել Վրաստանի իշխանությւոններին հետաքննել Մուխթարլիի առևանգումը, իսկ Ադրբեջանի իշխանություններին՝ ազատ արձակել լրագրողին: