თუ ნიკა მელია არ გადაიხდის გირაოს თანხას, ამოქმედდება ის მექანიზმები, რომელიც არის კონსტიტუციაში და რეგლამენტში
ქართულ ოცნებაში” აცხადებენ, რომ კანონი ყველასთვის თანაბარია და ნიკა მელიამ დაკისრებული გირაო უნდა გადაიხადოს. მათივე თქმით, არცერთ ადამიანს, მიუხედავად თანამდებობისა, არ აქვს უფლება უგულებელყოს პროკურატურის და სასამართლოს მიერ დაწესებული სანქცია.
როგორც მმართველ გუნდში ამბობენ, იმ შემთხვევაში, თუ “ნაციონალური მოძრაობის” თავმჯდომარე გირაოს არ გადაიხდის, ამოქმედდება რეგლამენტით და კონსტიტუციით განსაზღვრული სანქციები, რომლებიც, საბოლოოდ, მისთვის უფლებამოსილების შეჩერებას გულისხმობს.
“კანონი ყველასთვის არის თანაბრად განაწილებული და ყველა უნდა აგოს საკუთარ ქმედებებზე პასუხი. რა თქმა უნდა, არსებობს პროცედურები. ნიკა მელიას გადაწყვეტილებები იქნება ავტორი მის მიმართ განხორციელებული პროცესებისა.
არ აქვს უფლება არავის, თავი აარიდოს პროკურატურის მოთხოვნას და სასამართლოს გადაწყვეტილებას. შესაბამისად, თუკი ნიკა მელია არ გადაიხდის იმ თანხას, რაც გირაოს სახით არის დაწესებული, ამოქმედდება ის მექანიზმები, რომელიც არის საქართველოს კონსტიტუციაში და რეგლამენტში,” – განაცხადა პარლამენტის იურიდიულ საკითხთა კომიტეტის თავმჯდომარის პირველმა მოადგილემ დავით მათიკაშვილმა.
პარტია “ნაციონალური მოძრაობის” თავმჯდომარემ ნიკა მელიამ გუშინ სოციალურ ქსელში კიდევ ერთხელ დაწერა, რომ გირაოს გადახდას არ აპირებს და, მისი თქმით, არც არავის აქვს უფლება, მის მაგივრად ეს გააკეთოს.