(Казан, 11 июнь, «Татар-информ»). Мәскәү татарлары яшьләре «Cash Flow татарча» уенын башлап җибәрә. Бу хакта Татарстан Республикасының Россия Федерациясендәге Тулы вәкаләтле вәкиллеге каршындагы яшьләр советы хәбәр итә. «Cash Flow татарча» — танылган америка миллионеры, эшмәкәр Роберт Кийосаки уенының адаптацияләнгән варианты. «Уен форматында онлайн рәвештә без финанс грамоталылыгы терминнарына, акча эшләү серләренә төшенәчәкбез, финанслар дөньясының белгечләре белән әңгәмәләр корырбыз», — дип хәбәр итә чараны оештыручылар. «Cash Flow татарча» әлегә тест режимында башланып китте. Уенга әкренләп татарча сүзләр һәм финанс терминнар кертеләчәк. Оештыручалар хәбәр итүенә, татар телен һәм финанслар дөньясын белү зарур түгел, «уенда барысына да өйрәнеп булачак».
