(Казан, 30 июнь, «Татар-информ»). Июль аенда Башкортстанның Баймак районында «Башкорт аты» башкорт токымлы атларның республика фестивален уздыру планлаштырыла. Фестиваль ат үрчетү, кымыз җитештерү һәм һөнәрчелек традицияләрен, спорт ярышларын саклап калу һәм үстерү максатларында оештырыла. «Башинформ» хәбәр итүенчә, Башкорт атлары көнен оештыру тәкъдиме белән Бөтендөнья башкорт корылтае чыккан, БР Башлыгы инициативаны хуплаган һәм тиешле указ чыгарган. Бәйрәм ел саен июльнең өченче шимбәсендә үткәрелергә тиеш. Быел төрле ярышлар, шул исәптән ат җигү һәм көрәшне берләштергән аударыш ярышы уздыру планлаштырыла. Башкорт Корылтае матбугат хезмәтендә төбәк брендларын, традицион уеннарны һәм ярышларны торгызу Башкорт халкы стратегиясе бурычларына кертелгәнлеген искәрттеләр.
