Олеся Лесная Рамазановларның концертында: Ризат белән Зинираның нинди кушаматлары бар?

Иҗади гаилә Зинира һәм Ризат Рамазановларның Казандагы концертларында сәхнә артында блогер Олеся Лесная да булган.

– Ризак бит әле син име?

– Ризак.

– Сине күп кенә кешеләр бутый. Мәсәлән, мин сине Зират дип әйтәм. Ә хатыныңа Резина дип әйтәсе килә. Кызык итеп ничек бутаганнары бар?

– Иң кызыгы шул инде. Син – Зират, хатының – Резина диләр. Кайбер кешеләр: «Рәхмәт сиңа, Зират», – дип әйтә дә. Аннары тизрәк гафу үтенә башлыйлар. «Ярар, мин ияләнгән инде», – дип әйтәм. Мин ияләнгән. Мин үпкәли торган кеше түгел.

– Бу – синең чын исемеңме?

– Икенче исемем – Миңлебай. (Җырчы кулындагы миңнәрен күрсәтә).

– Күп кенә җырлы гаиләләр аерым җырлый башлады. Сезнең андый теләк юкмы?

– Кадерле халыкка Ризат белән Зинира кирәк. Шуңа күрә тамашачыга нәрсә кирәк – шуны тәкъдим итәргә тырышабыз.

– Бәлки, синең тавышың юктыр. Шуңа җырламыйсыңдыр.

– Бәлки, шулайдыр.

– Кемнең иҗатын яратмыйсың?

– Кумирым да юк, яратмаган кешем дә юк.

– Конфликтлар юкмы? Җыр бүлешә алмаган чаклар.

– Ишеткәнең бармы, булса, ирешкән булыр иде.

– Сезгә ирешкән иң начар хейт?

– Әле менә кичә генә бер кыз язды. Бәдрәфкә төшеп барганда: «И, боларның икесенең дә тавышы юк инде», – дип әйткән бер апа. «Ник килдегез?» – дигәч, «Белмим, киләсе килде», – дип әйткән.

– Ошатмасалар да йөриләр инде алайса...

– Кемдер тикшерер өчен киләдер инде.

Аннары Лесная Зинира белән әңгәмә кора.

– Синдә – барлык кызлар көнләшерлек гәүдә, махсус шулай эшлисеңме әллә?

– Безнең авылда «ябык сыер сөтле була» диләр. Нәселдә дә таза кешеләр юк. Тормыш рәвеше шундый, җәйге ялга чыккач, азрак җыям, гастрольләр вакытында күзгә күренеп ябыгып алам.

– Болгар премиясендә сезнең күкрәкләрне зур итеп күргән идем. Сез пластик операция ясаттыгызмы әллә?

– Юк! Күлмәге шундый иде. Бер хыялланып алган идем, зурайтырга түгел, күтәртергә. Хатын-кыз бала тапкач үзгәрешләр була бит инде. Шуны эшлисе килгән иде, әлегә Ризат канәгать.

– Нишләп социаль челтәрдә икегезгә бер сәхифә?

– Минем «бит»не блокладылар. Бер шоурум үзенә алды. Без бит өйдә дә, эштә дә бергә. Шулай җайлы булыр дип, берләштереп куйдык.

– Сезнең аудитория өлкәннәр, яшьләр өчен иҗат итәсе килмиме? Даң-доң.

– Безнең яшьләр өчен җырлар бар бит. Үп-үп, үпкәләмә… Ул җырны язгач, нигә «үпкә турында» җыр яздыгыз дип тәнкыйтьләделәр дә. Мәгънәсез, тозсыз җыр дип тә яздылар.

– Хейтерлар Зинира улый дип яза. Аларга фикерең нинди?

– Табигать биргән, шул тавыш. Без хейтерларга игътибар бирмибез.

– Ризаттан кала кеше белән дуэт җырлар идеңме?

– Юк.

– Егетләр яза алмый инде алайса?

– И, алай димә, язганы – яза…

Аннары Олеся сәхнә артына керә. Аның сорауларына шаккатып, Ризат: «Каян таптыгыз моны?» – дип тә куя.

– Керүгә – трусик. Кемнеке бу?

– Нәрсә эшлисең син? Минеке, чип-чиста. Өр-яңа.

– Трусикларыңны каян сатып аласың?

– Миңа киемнәрне Зинира ала.

– Моны Зинира тектеме әллә?

– Юк, әни. Җөйсез алар.

– Авыртамы әллә?

– Авыртмый. Күренмәсен өчен.

– Бу ялтыр-йолтырларны кем тектерә? (Блогер сәхнә костюмнарын күрсәтә).

– Зинира.

– Чегән төсле сез.

– Чегән төсле. Сәхнәдә шундый кирәк.

Аннары чупа-чупс суырып утырган Олесяга Ризат та кисәтү ясап куя. «Шушы яшеңдә чупа-чупс суырып утырмыйлар инде», – ди җырчы.