Төнлә БПЛА һөҗүме куркынычы булу сәбәпле, Казан аэропортында берничә рейс тоткарлана

БПЛА һөҗүме куркынычы булу сәбәпле, Казан аэропортында чикләүләр кертелгән. Шул сәбәпле очып килергә һәм очып китәргә тиешле берничә рейс тоткарлана. Бу хакта аэропортның онлайн-таблосындагы мәгълүматлардан күренә, дип яза «Татар-информ».

Мәсәлән, Шереметьево аэропортына оча торган рейс 8:55 сәгатьтән 10:55 сәгатькә күчерелгән, ә Казаннан Сочига оча торган рейс 9:50дән 11:50гә күчерелгән.

Шереметьеводан Казанга кайта торган самолет 8:05 сәгатьтә килергә тиеш, әмма ул 10:05 сәгатьтә генә кайтачак, ә Таулы Алтайдан 8:40 сәгатьтә кайтып җитәргә тиешле рейсны 10:40 сәгатькә күчергәннәр.

Росавиация хәбәр иткәнчә, Казан аэропортында 3:35 сәгатьтән 6:18 сәгатькә кадәр чикләүләре гамәлдә булган. Россия Оборона министрлыгында хәбәр итүләренчә, төнлә һава һөҗүменә каршы оборона чаралары 49 беспилотникны юкка чыгарган, аларның икесен Чувашия территориясендә бәреп төшергәннәр, диелә хәбәрдә.