Тивĕçлĕ хӳтĕлерĕç
Чăваш Ен чысне çӳллĕ шайра хӳтĕлерĕç. Раççейри хĕллехи ял спорчĕн 11-мĕш вăййисенче республикăн пĕрлештернĕ ушкăнĕ ялсенче 450 000-рен сахалтарах пурăнакан регионсен йышĕнче иккĕмĕш вырăн çĕнсе илчĕç. Çĕршывĕпех илсен вара пирĕн спортсменсем улттăмĕш.
Ял спорчĕн вăййисене «Демографи» наци проектне кĕрекен «Спорт – пурнăç йĕрки» проектпа килĕшӳллĕн йĕркелеççĕ. Унăн тĕп тĕллевĕ – ялсене аталантарасси тата унта пурăнакансене сывă пурнăç йĕркине явăçтарасси. Турнир Вологда облаçĕнчи Череповец хулинче иртрĕ. Ăмăртăва 47 регионти 740 ытла ял хастарĕ хутшăнчĕ. Чăваш Ен пĕрлештернĕ ушкăнĕнче Муркаш, Вăрнар, Çĕрпӳ, Шупашкар, Тăвай, Етĕрне тăрăхĕсенчи 17 спортсмен. Ĕне сăвакансен ăмăртăвĕнче Надежда Петрова кĕмĕл медаль тивĕçрĕ. Глафира хĕрĕпе виçĕ енлĕ тупăшура вĕсем иккĕмĕш пулчĕç. Механизаторсен тупăшăвĕнче Эльвира Чугунова та кĕмĕл медаль çĕнсе илчĕ. Икĕ ăмăртура та хастар пулнипе хĕрсем кубок та çĕнсе илчĕç.