Որտեղ կան մեծ նյութական միջոցներ, միշտ կան ռիսկեր, չարաշահողների ձեռքը պետք է բռնենք և պատժենք. ՊՆ խոսնակ
Պաշտպանության նախարարի մամուլի քարտուղար Արծրուն Հովհաննիսյանը Tert.am-ի հետ զրույցում անդրադարձավ ՊՆ հրամանատար Արտակ Մաթևոսյանին դեմ հարուցված քրգորին, որով վերջինիս մեղադրանք է առաջադրվել այն բանի համար, որ լինելով ՀՀ ՊՆ N զորամասի «Օսա-ԱԿ» զենիթահրթիռային դիվիզիոնի հրամանատարի նյութատեխնիկական ապահովման գծով տեղակալ՝ ցանկացել է զորամասի պատկանող դիզվառելիքից որոշ մաս յուրացնել, օգտագործելով իր պաշտոնեական դիրքը, կատարել է յուրացման փորձ:
Արծրուն Հովհաննիսյանը նախ նշեց, որ Արտակ Մաթևոսյանը ՊՆ պաշտոնյա չէ, այլ՝ զինծառայող:
«Այս ամենը մեր որդեգրած քաղաքականությանը համաձայն է, այսինքն, ինչպես Պաշտպանության նախարարն է ասել, բոլոր չարաշահողների, հանցանք ու զանցանք կատարողների ձեռքը պետք է բռնենք և պատժենք, ինչպես տվյալ օրինակը ցույց է տալիս: Ռազմական ոստիկանության աշխատակիցները, որոնք ևս ՊՆ աշխատակիցներ են, իրենց գործը կատարել են, չարաշահողին բռնել և գործը հանձնել են համապատասխան մարմիններին»,-ասաց նա և նշեց, որ հետասյու էլ մշտապես հետևելու են և բոլոր թերացողներին բռնելու են:
Ինչ վերաբերում է չարաշահումների համար առկա ռիսկերին, ապա մամուլի քարտուղարը նշեց. «Որտեղ որ կան մեծ նյութական միջոցներ, միշտ էլ կան ռիսկեր, դրա համար մենք պետք է այնքան լավ աշխատենք, որ կարողանանք չարաշահում անողներին բռնենք»:
Խոսելով ռիսկերի նվազեցման մասին՝ Արծրուն Հովհաննիսյանն ասաց, որ դրա համար իրականացվում է մեծ աշխատանք` տարբեր ուղղություններով: