Manchester United-ի սենսացիոն պարտությունը
Հանդիպման վերջին վայրկյաններին գրավելով Ժոզե Մոուրինյոյի թիմի դարպասը՝ բրիստոլցիներն անցել են կիսաեզրափակիչ, որտեղ պայքարելու են Manchester United-ի մշտական մրցակից Manchester City-ի հետ, որի մարզիչն էլ Ժոզե Մոուրինյոյի մշտական մրցակից Խոսեպ Գվարդիոլան է:
Մյուս կիսաեզրափակիչում հանդիպելու են Լոնդոնի երկու ակումբներ՝ Chelsea-ն և Arsenal-ը:
Երեկվա հանդիպումից հետո Մոուրինյոն գովեստով է խոսել մրցակիցների մասին՝ ասելով, որ բրիստոլցիները համառ և կամային պայքարով են հասել հաջողության:
«Ես չեմ ուզում քննադատել իմ մարզիկներին, նրանք բաց են թողել կիսաեզրափակիչ անցնելու հնարավորությունը, հավանաբար, չեն ունեցել այն մոտիվացիան, որն ուներ Բրիստոլի թիմը», - ասել է Մոուրինյոն:
Անգլիական մամուլում «սենսացիոն» են որակում Մանչեստերի թիմի պարտությունը: Մարզական մեկնաբանները ենթադրում են, որ հունվարին մի շարք խաղացողներ կհեռանան թիմից:
Բավական երկար տևած դադարից հետո Manchester United-ի կազմում երեկ փոխարինման է դուրս եկել Հայաստանի հավաքականի ավագ Հենրիխ Մխիթարյանն, ով առանձին դրվագներում աչքի է ընկել հմուտ փոխանցումներով:
Բրիտանական մամուլում նշում են, որ հայազգի կիսապաշտպանը կարող է 2018 թվականին տեղափոխվել որևէ այլ ակումբ: