«Լուսավոր Հայաստան»-ի անդամակցությունը որևէ կերպ չի խոչընդոտի ՀԱԿ-ի մասնակցությանը. «ԱԼԴԵ» փոխնախագահ
Օրերս «Լուսավոր Հայաստան» կուսակցության նախագահ Էդմոն Մարուքյանը հայտարարեց, որ իրենք ձգտում են անդամակցել «ԱԼԴԵ» եվրոպական լիբերալ կուսակցությանը:
Հայտարարությունը հնչեցվեց ԼՀ համագումարի ժամանակ՝ հենց «ԱԼԴԵ»-ից Երևան ժամանած անդամների ներկայությամբ:
«ԱԼԴԵ»-ում Հայաստանը ներկայացնող քաղաքական ուժը «Հայ ազգային կոնգրեսն» է: Ինչպես Tert.am-ի հետ զրույցում ասաց «ԱԼԴԵ» փոխնախագահ Հենրիկ Մորթենսենը «Լուսավոր Հայաստան»-ի անդամակցությունը որևէ կերպ չի խոչընդոտի ՀԱԿ-ի մասնակցությանը:
«Մեզ կարող են անդամակցել յուրաքանչյուր երկրից տարբեր թվով կուսակցություններ: «ԱԼԴԵ» անդամ-պետություններ կան, որոնք մի քանի կուսակցությամբ են ներկայացված»,- ասաց նա:
Հենրիկ Մորթենսենը նշեց, որ իրենք «Լուսավոր Հայաստանի» անդամակցության վերաբերյալ դեռ որոշում չեն կայացրել, այս պահին ընթանում է ճանաչողական փուլ: «Մենք կառուցում ենք հարաբերություններ միմյանց միջև, այս գործընթացը ենթադրում է ճանաչել միմյանց»,- նշեց փոխնախագահը:
Հարցին՝ որքանո՞վ է «Լուսավոր Հայաստանը» համապատասխանում լիբերալության չափանիշներին, Հ. Մորթենսենը պատասխանեց. «Լիբերալությունը տարբեր երկրներում տարբեր կերպ է արտահայտվում՝ կապված այդ երկրներում մշակութային, քաղաքական և այլ առանձնահատկությունների հետ: Բայց հիմնականում լիբերալ ուժերը աջակցում են ժողովրդավարության հաստատմանը, պաշտպանում մարդու իրավունքները և այլն»:
«Լուսավոր Հայաստան»-ի նախագահ Էդմոն Մարուքյանն էլ ասաց, որ մի անգամ արդեն «ԱԼԴԵ» խորհրդում քննարկվել է իրենց անդամակցության հարցը, հիմա ընթանում են բանակցություններ, Հայաստան է ժամանել առաքելություն՝ ծանոթանալու համար կուսակցության հետ, ինչից հետո անդամակցության պարագայում կսկսվի թղթաբանությունը:
«Իրենք ունեն իրենց չափանիշները և դրանց համապատասխան գնահատում են կուսակցությունը»,- նշեց Է. Մարուքյանը:
Մարուքյանն էլ ասաց, որ իրենց անդամակցությունը ՀԱԿ-ին չի խանգարում: Նա նշեց, որ ՀԱԿ ներկայացուցիչների հետ հանդիպել են «ԱԼԴԵ»-ի հավաքների ժամանակ, ժողովների ժամանակ:
Պիտեր Բոխմանն էլ, ով «Հանուն ազատության հիմնադրամի» մշտական ներկայացուցիչն է Հարավային Կովկասում, լիբերալության վկայություն հանդիսացող հատկանիշների շարքում կարևորեց փոքրամասնությունների իրավունքների պաշտպանությունը:
Այս առնչությամբ Tert.am-ը Էդմոն Մարուքյանից հետաքրքրվեց՝ պատրա՞ստ են պաշտպանել ԼԳԲԹ համայնքի և կրոնական փոքրամասնությունների իրավունքները: Էդմոն Մարուքյանը պատասխանեց, որ իրենք այդ թեմաներից չեն խորշում:
«Մենք այս պահին խորը ուսումնասիրում ենք կրոնական կազմակերպությունների մասին օրենքը: Լուրջ մտահոգություններ կան այս օրենքի հետ կապված: Բնականաբար, մենք այս առնչությամբ խորհրդարանում մեր ասելիքն ու անելիքը կունենանք: Մեզ ամեն դեպքում մինչ այս չեն դիմել, ինչ վերաբերում է ԼԳԲԹ համայնքին, ապա կարող եմ ասել, որ նորից՝ չեն դիմել: Ցանկացած մարդու իրավունքի պաշտպանությամբ մենք զբաղվում ենք: Մենք չենք առանձնացնում մարդկանց՝ մաշկի գույնով կամ նրանով՝ առաքելակա՞ն, թե՞ ավետարանական եկեղեցու հետևորդ է»,- մանրամասնեց Էդմոն Մարուքյանը:
Պատգամավորն ասաց, որ խտրականությունից բոլորը պետք է զերծ մնան: «Չկա որևէ հարց, որը վերաբերի մարդու իրավունքների պաշտպանությանը, որ մենք դրանից խորշենք: Եթե տեսնենք, որ մեկին բռնության են ենթարկում, նրան պաշտպանելուց առաջ չենք մտածելու՝ փոքրամասնությո՞ւն է, թե չէ, չենք ասելու՝ փոքրամասնություն է, ծեծում են դրա համար, լավ են անում, իհարկե ոչ»,- նշեց Էդմոն Մարուքյանը: