Собчак: Крым Орусия үчүн "балакеттин булагы"
"Крым маселеси менин балдарыма да калат. Анын айынан бүгүн биз санкцияларга кабылдык. Бардык балекеттер, бүтүндөй дүйнө менен келишпестик болууда. Бул чоң көйгөй", - деди Собчак 12-мартта Биринчи каналдагы дебат учурунда.
Ал Крымга гуманитардык миссия менен барууга ниет кылганын билдирди. Ал жакта үгүт жүргүзмөк болгон деген кабарларды төгүндөдү.
6-мартта Собчак Крымга кирүүгө, ал жактагы жагдайга нааразы крым-татарлары менен сүйлөшүүгө уруксат сурап Украина элчилигине кайрылган. Киев муну басып алынган аймакта шайлоого карата үгүт жүргүзүү катары баалаган.
Собчак эл аралык укукка ылайык Крым Украинанын аймагы деп эсептейт.
Орусия 2014-жылы Крымды өзүнө каратып алган. Муну дүйнөлүк коомчулук тааныган эмес. Батыш өлкөлөрү Орусияга каршы санкцияларды салып, жарым жыл сайын узартып келет.