Kyivde Qırımtatar Milliy Meclisi liderleriniñ çetel elçileri ile körüşüvi başlandı (+ foto)
Qırım.Aqiqat muhbiriniñ bildirgenine köre, tedbirde Qırımtatar Milliy Meclisiniñ reisi Refat Çubarov, Ukraina prezidentiniñ qırımtatar halqınıñ işleri boyunca vekili Mustafa Cemilev, Ukraina Tış işleri naziri Pavlo Klimkin, Yuqarı Radanıñ insan aqları boyunca vekili Valeriya Lutkovskaya, Qırım Muhtar Cumhuriyeti prokurorı Gündüz Mamedov, Ukraina halq deputatı Georgiy Logvinskiy, Ukraina ukümetiniñ vekilleri, AQŞ, Türkiye, Büyük Britaniya ve diger devletlerniñ vekilleri.
Ondan ğayrı körüşüvde Qırımtatar Milliy Meclisi, aq-uquq qorçalayıcı teşkilâtlarınıñ vekilleri, jurnalistler iştirak etti.
Bunun arfesinde Qırımtatar Milliy Meclisi, muracaatname yayınlap, içinde qırımtatarlarnı ilhaq etilgen Qırımda Rusiyeniñ prezident saylavında iştirak etmemege davet etti.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.