გამოცემა „მედუზისა“ და სხვა რუსულენოვანი საინფორმაციო საშუალებების ცნობით, ნერვულ-პარალიტიკური ნივთიერება „ნოვიჩოკი“, რომლითაც 4 მარტს ბრიტანეთში მოწამლეს ყოფილი რუსი ჯაშუში სერგეი სკრიპალი და მისი ქალიშვილი, მანამდე ერთადერთხელ იქნა გამოყენებული - 1995 წელს მოსკოვში. მაშინ მოწამლეს ბანკირი ივან კიველიდი და მისი მდივანი, ზარა ისმაილოვა. ორივე გარდაიცვალა. მოსკოვის სასამართლომ მკვლელობაში დამნაშავედ ცნო კიველიდის ბიზნესპარტნიორი ვლადიმირ ხუციშვილი, რომელსაც 2007 წელს მიუსაჯა ცხრა წლით პატიმრობა. რიგაში დაფუძნებულ რუსულენოვან გამოცემა „მედუზის“ ინფორმაციით, „ნოვიჩოკს“ უწოდებენ ნერვულ-პარალიტიკური მოქმედების საბრძოლო ნივთიერებებს, რომლებიც შეიქმნა ჯერ კიდევ საბჭოთა პერიოდში, ორგანული ქიმიისა და ტექნოლოგიის სამხელმწიფო სამეცნიერო-კვლევით ინსტიტუტში (ГНИИОХТ). მის შესახებ ცნობილია ნივთიერების ერთ-ერთი შემქმნელის, აშშ-ში 1990-იან წლებში გადასახლებული ვილ მირზაიანოვისაგან. ამ წყაროს თანახმად, „ნოვიჩოკი“ გაცილებით უფრო ძლიერია, ვიდრე, მაგალითად, ზარინი და მისი დამზადება შესაძლებელია იოლად ხელმისაწვდომი ქიმიკატებისაგან, რომელთაც სასუქებისა და პესტიციდების დამზადებისას იყენებენ. „ნოვიჩოკი“ ზღუდავს სუნთქვას და ანელებს გულისცემას. რუსეთის ფედერაციის საბჭოში გამოაცხადეს, რომ რუსეთს განადგურებული აქვს ქიმიური იარაღის მთელი მარაგი, „ნოვიჩოკის“ ჩათვლით. 13 მარტს რუსეთის საგარეო საქმეთა მინისტრმა სერგეი ლავროვმა უარყო ბრალდება, რომ მოსკოვი დგას ყოფილი ჯაშუშის, სერგეი სკრიპალისა და მისი ქალიშვილის ბრიტანეთში მოწამვლის უკან. ასევე ლავროვის თქმით, არ შესრულდება ბრიტანეთის მოთხოვნა, რომ მოსკოვმა 13 მარტს, დღის ბოლომდე განმარტოს, როგორ იქნა გამოყენებული ნერვულ-პარალიტიკური ნივთიერება ინგლისის ქალაქ სოლსბერიში სკრიპალისა და მისი ქალიშვილის წინააღმდეგ მიმართული თავდასხმისათვის. „ჩვენ, რასაკვირველია, მოვისმინეთ ულტიმატუმი“, განაცხადა ლავროვმა, რითაც მიანიშნა ბრიტანეთის ხელისუფლების მიერ განსაზღვრულ ვადაზე. როგორც პრემიერ-მინისტრმა ტერეზა მეიმ 12 მარტს განაცხადა, „დიდია ალბათობა“, რომ რუსეთი დგას სკრიპალისა და მისი ქალიშვილის მკვლელობის მცდელობის უკან.
