Baluhnı Aqmescit tahqiqat izolâtorınıñ kartserine yollamaq isteyler – aq-uquq qorçalayıcıları
Rusiye tarafından ilhaq etilgen Qırımda mahküm etilen ve mart 19-dan başlap açlıq tutqan ukrain faaliyetçisi Volodımır Baluhnı Aqmescit tahqiqat izolâtorınıñ kartserine yollamaq isteyler. Bunı aprel 20-de Qırım insan aqlarını qorçalav gruppası bildire.
Aq-uquq qorçalayıcılarınıñ malümatına köre, Balunnı «içerideki kün tertibi qaideleriniñ bozuluvı»nda qabaatlaylar.
Bildirüvde: «Ukrainalı kartserde üç kün üç gece bulunacaq. Bir kişini kartserge yerleştirüv aqqında qarar, tahqiqat izolâtorınıñ hadimlerinden ibaret komissiya tarafından alına. Kartserde bulunğan mabüslerge yazışuv, advokattan ğayrı kişilernen körüşüv ve, ondan ğayrı, azıq ve ilk nevbette kerek olğan şeylerni satın aluv yasaq etile. Olarnıñ, tıştan qutu ile yiberilgen ve paket ile ketirilgen şeyler ve aşlarnı almağa aqqı yoq. Yuqu yerini ise yalıñız gece, mahsus ayırılğan saatlarda qullanmaq mumkün», – denile.
Aynı zamanda, aq-uquq qorçalayıcılarınıñ malümatına köre, Baluh daa kartserge keçirilmedi, çünki tahqiqat izolâtorınıñ rıqma-rıq tolu olğanından sebepli bu çeşit cezalarnıñ eda etilmesi içün nevbet bar.
Qırım Tahqiqat izolâtorınıñ rehberleri tarafından açıq menbalarda bu hususta berilgen izaatlar yoq.
Baluh, mart 19-da ilân etken muddetsiz açlıqnı tutmağa devam ete.
İlhaq etilgen Qırımda mahkeme Baluhnı, arbiy yedeklerniñ saqlanmasında qabaatlı tanıp, oña 3 yıl ve 5 ay muddetine koloniya-qasabada azatlıqtan marum etüv ve ondan ğayrı 10 000 ruble (qararnen 4600 hrivna) miqdarında cöreme tölev ukmüni çıqardı.
Faaliyetçige qarşı ekinci cinaiy iş Aqşeyh (Razdolnoye) qasabasındaki muvaqqat tutuluv izolâtorınıñ rehberi Valeriy Tkaçenko tarafından berilgen ariza esasında açıldı. O, Baluh onı kötekledi, dep iddia ete. Aynı zamanda faaliyetçi ve onıñ imayesi, Tkaçenko özü oña ucüm etkenini bildireler.
Mart 19-da Kremlniñ kontroli altında olğan Aqşeyh rayon mahkemesi Volodımır Baluhqa 2018 senesi iyün 19-ğa qadar tevqif etilüv şeklinde sıñırlav tedbirini sayladı.
Mart 28-de Ukraina Tış işleri nazirligi Baluhnıñ deral azat etilmesini talap etti.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.
Baluhnıñ qorçalavı ve aq-uquq qorçalayıcıları, onıñ Ukraina vatanperveri olğanı sebebinden – eviniñ azbarında Ukraina bayrağı olğanı içün repressiyalar qurbanı olğanını iddia eteler.