Refat Çubarov: «Uzeir Abdullayev içün ölüm telükesi qalmadı»
Qırımtatar Milliy Meclisiniñ reisi, Ukraina halq deputatı Refat Çubarov, Aqmescitteki «Hizb ut-Tahriri işi» figurantı Uzeir Abdullayevniñ «ölüm telükesi altında» bulunğanını bildirgen edi. Bunı Çubarov özüniñ Facebooktaki saifesinde yazdı.
Çubarov: «İçtimaiy ağlar, Aqmescitniñ tahqiqat izolâtorında munasip tibbiy yardımnıñ kösterilmemesi sebebinden ölmekte olğan qırımtatar, siyasiy mabüs Uzeir Abdullayevniñ kritik vaziyeti aqqında başta aqrabaları ve ondan soñ advokatlar ve aq-uquq qorçalayıcılarınıñ telâşlı bildirüvleri ile toldı. Malüm oldı ki, onda üçünci kün «40 derecege barayatqan yüksek sıcağı bar ve, eñ esası, sol ayağı şişti. Ekimler diagnozını bildirmeyler». Uzeirniñ alı o qadar fena edi ki, o ayaq üstünde turamay edi», – dep qayd etti.
Lâkin Kyiv, Aqmescit ve Moskvada türlü insanlar tarafından yapılğan areketler sayesinde «Uzeir içün ölüm telükesi artıp yoq, ve şimdi o, ekimlerniñ kontroli altında buluna», dep qayd etti Meclisniñ reisi.
Siyasetçi: «Qurtuluşında iştirak etken bir çoq insanlarnıñ sayesinde tüzetilmez şey olğan Uzeirniñ ölüminden qaçınmaq mümkün oldı. Aynı zamanda, olarnıñ bir çoqu (işniñ menfaatı içün) içtimaiy ağlarda munasip postlar ve izaatlar yerleştirmek imkânına saip degiller», – dep qayd etti.
Bundan evel aprel 30-da «Qırım birdemligi» cemiyet birleşmesiniñ oturışuvında Uzeir Abdullayevniñ apayı Fera Abdullayeva, onıñ aprel 30-da Aqmescitteki tahqiqat izolâtorınıñ tibbiy bölügine keçirilgenini bildirdi .
Daa evel Abdullayevniñ anası, tahqiqat izolâtorında bulunğan oğlunda bir qaç künden berli yüksek sıcağı, ayağında şişik ve şişiklik bar, o, dayanılmaz ağrılar çeke, dep bildirdi. Dilâra Abdullayevanıñ bildirgenine köre, bu alâmetler qannıñ zeerlenmesini köstermek mümkünler.
Rusiye advokatı Nikolay Polozov, Rusiye prezidenti yanındaki İnsan aqları boyunca şura (İAŞ) ve Rusiye ombudsmeni Tatyana Moskalkovadan Abdullayev etrafındaki vaziyetke qarşılıq köstermekni rica etti.
Kremlniñ kontroli altında olğan Qırım Yuqarı mahkemesi Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnıñ qorçalayıcıları tarafından sıñırlav tedbiriniñ uzatılmasına qarşı berilgen apellâtsiyalarnı red etti.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.