«Սասնա ծռեր»-ի աջակիցները շրջափակել են Դատախազության շենքի մուտքերը, պահանջում են Արթուր Դավթյանի հրաժարականը
Նրանք պահանջում են Գլխավոր դատախազ Արթուր Դավթյանի հրաժարականը։
«Մեր նորանշանակ վարչապետը, երբ որ հայտարարում է, որ Հայաստանում չպետք է լինեն քաղբանտարկյալներ, բայց նրան ենթակա մեկը ոտնահարում է իրականությունը և հայտարարում է, որ Հայաստանում չկան քաղբանտարկյալներ, սա հիմք է տալիս մեզ մտածել, որ այն կառույցը, որն այդտեղ տարիներ շարունակ գործել է ապօրինի, ժողովրդական էս զարթոնքից հետո նորից գործում է ապօրինի ու ցանկանում է նորից վերադարձնի Սերժ Սարգսյանի ռեժիմը։ Մինչև դատախազը հրաժարական չտա, էս կառույցը չի կարող աշխատել, որովհետև այն չի աշխատում ի շահ ժողովրդի», - «Ազատության» հետ զրույցում ասաց ցուցարարներից մեկը։
Նշենք, որ մայիսի 16-ին դատարանը մերժեց «Սասնա ծռերին» ազատ արձակելու միջնորդությունը,նրանց աջակիցները փակեցին Արշակունյաց պողոտան։ Հաջորդ օրը վարչապետ Նիկոլ Փաշինյանը կոչ արեց դադարեցնել բողոքի բոլոր գործողությունները։
Նա հայտարարեց, որ քաղբանտարկյալների խնդրին պետք է լուծում տրվի օրենքով նախատեսված գործիքների կիրառմամբ։ «Այդ խնդրին պետք է լուծում տրվի, որպեսզի Հայաստանը ազատվի քաղբանտարկյալներ ունեցող երկրի խարանից, և ինձ համար խնդիրը հետևյալն է՝ շատերը պատկերացնում են, որ այդ հայտարարությունից հետո պետք է գնանք և բանտախցերի դռները բացենք և մեր քաղբանտարկյալներին ասենք՝ «ժողովուրդ ջան, դուրս եկեք», ես կարծում եմ, որ դա ճիշտ ճանապարհ չէ, դա օրինական ճանապարհ չէ, և մենք քաղբանտարկյալների խնդիրը պետք է լուծենք օրենքով նախատեսված գործիքների կիրառման միջոցով», - հայտարարեց Փաշինյանը։
Չնայած Նիկոլ Փաշինյանի հայտարարություններին, գլխավոր դատախազը պնդում է, որ Հայաստանում քաղբանտարկյալներ չկան։