Nyü-Yorkta Oleg Sentsovğa qol tutuv tedbiri keçirildi
Nyü-Yorkta faaliyetçiler Ukraina rejissörı, Qırım sakini Oleg Sentsovğa qol tutuv tedbirini keçirdiler.
Tedbir iştirakçileri, Sentsovnı apisten azat etmek talabınen Tayms-skver soqağına çıqtılar. Olarnıñ bir qısmı qolunda Free Sentsov plakatlarını tuta, digerler ise improvizatsiya etilgen mabüsler kiyimlerini kiyip, qollarında qum saatları ile soqaqnıñ ortasında yerge oturdılar.
Tedbirni teşkil etkenlerniñ Facebooktaki bildirüvinde: «Muddetsiz açlıq sebebinden vaqıt Sentsov içün soñuna yetti. Aqları ve menlikleri aşalanğan insanlar içün de vaqın soñuna yetmek üzre. Rusiyeniñ Ukrainağa ve bütün azat dünyağa qarşı tecavuzına emiyet bermemege devam etsek, bizim toplulığımız içün de vaqıt soñuna yetecek», – denile.
Tedbirde 50 qadar insan iştirak etti.
Oleg Sentsov, Aleksandr Kolçenko ile beraber Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, sert rejimli koloniyada 20 yılğa mahküm etti. Kolçenkoğa 10 yıl koloniya berildi. Ekisi de qabaatlarını tanımadı.
Ukraina rejissörı, Qırım sakini Oleg Sentsov Yamalo-Nenetsk muhtar okrugınıñ Labıtnangi şeerindeki 8 nomeralı («Beyaz ayuv» adlı) koloniyada buluna.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.