Qirg‘iziston sobiq Bosh vaziri Sapar Isaqov hibsga olindi
Qirg‘iziston rasmiylari mamlakat sobiq Bosh vaziri Sapar Isaqovning unga nisbatan ochilgan jinoiy ish doirasida hisbga olinganini e’lon qildi.
Davlat milliy xavfsizlik xizmati bayonotiga ko‘ra¸ Isaqov jinoyat ishi yuzasidan tergov amaliyotlari tugagunga qadar¸ ehtiyot chorasi sifatida hibsda saqlanadi.
Isakov Bishkekdagi issiqlik stansiyasini modernizatsiya qilish bilash bog‘liq jarayonda katta miqdordagi korrupsiyada ayblanmoqda.
Isakovning hibsga olinishi Davlat milliy xavfsizlik xizmati 29 may kuni Isakovni uchinchi marta so‘roqqa chaqirganini e’lon qilganidan sanoqli kunlar o‘tib amalga oshirildi.
Bishkekda olti soat davom etgan so‘roqdan so‘ng sobiq bosh vazirga ayblov e’lon qilingan va mamlakatni tark etmaslik haqidagi tilxatga qo‘l qo‘ygach¸ qo‘yib yuborilgan edi.
- Bishkek shahar Issiqlik elektr stansiyasini modernizatsiyalash paytidagi korrupsiya yuzasidan ochilgan jinoyat ishi doirasida sobiq bosh vazir Sapar Isaqovga “Korrupsiya” moddasi bo‘yicha ayblov bildirildi. Unga nisbatan shaharni tark etmaslik haqida tilxat olib, ozodlikda qoldirish ehtiyot chorasi qo‘llanildi,- deb bildirgan edi Milliy xavfsizlik qo‘mitasi rasmiy vakili Raxat Sulaymanov 30 may kuni.
Bu voqeadan "shokka tushgani"ni bildirgan Isakov¸ o‘zining aybsizligi va ochilgan jinoiy ishning noqonuniy ekanini ta’kidlagan edi.
- Menga ayblov bildirish to‘g‘risidagi qarorni oxirigacha o‘qimadim. Hozir g‘azabimning chek-chegarasi yo‘q. Avval ijtimoiy tarmoqlarda Sapar Isaqovni rosa obro‘sizlantirishdi, endi esa jinoyatchi sifatida taqdim qilishmoqchi. Biz endi advokatlar ko‘magida aybsiz ekanimizni isbotlaymiz,- dedi Sapar Isaqov.
Modernizatsiyaga ajratilgan 385 million dollar g‘alvasi
Bishkek Issiqlik elektr stansiyasi Sapar Isaqov bosh vazir bo‘lib turgan 2017 yilda 385 million dollarga modernizatsiya qilingan edi. Biroq qish mavsumining eng ayozli kunlarida yangi ta’mirdan chiqarilgan issiqlik elektr stansiyasida favqulodda holatda avariya yuz berib, Qirg‘iziston poytaxti aholisi o‘n kundan ko‘proq sovuqda qolgan.
Shundan so‘ng parlament va huquq-tartibot tuzilmalari tekshiruv o‘tkazib, stansiya ta’miriga ajratilgan 385 million dollar mablag‘ nimalarga sarflanganini aniqlay olmagani ortidan jinoyat ishi ochilgan edi.
41 yashar Saprar Isaqov sobiq prezident Almazbek Atambaevning eng yaqin odamlaridan biri sifatida ko‘riladi. 2017 yilda Bosh vazir lavozimiga saylangan Sapar Isaqov joriy yilning 19 aprel kuni Qirg‘iziston parlamenti Hukumatga ishonchsizlik bildirish to‘g‘risida qaror qabul qilgani ortidan iste’fo berishga majbur bo‘lgan edi.