Կրեմլը հայտնում է, որ Ջոն Բոլթոնը պլանավորում է այցելել Մոսկվա

Կրեմլը հայտնում է, որ  ԱՄՆ-ի նախագահի ազգային անվտանգության հարցերով խորհրդական Ջոն Բոլթոնը պլանավորում է այցելել Մոսկվա: «Որքան մենք գիտենք, այդպիսի այցելություն ամենայն հավանականությամբ տեղի կունենա, սա այն ամենն է, ինչ կարող եմ ասել ներկայիս պահին», - այսօր պատասխանելով լրագրողների հարցերին՝ ասել է Ռուսաստանի նախագահի մամուլի խոսնակ Դմիտրի Պեսկովը:


«Ինտերֆաքս»  լրատվական գործակալությունը, վկայակոչելով Վաշինգտոնի իր աղբյուրները, այսօր ավելի վաղ հաղորդել էր, որ գալիք շաբաթվա ընթացքում ակնկալվում է Ջոն Բոլթոնի այցը  Մոսկվա՝ նախապատրաստելու Ռուսաստանի և ԱՄՆ-ի նախագահների հնարավոր հանդիպումը:


Ռուսաստանի արտգործնախարար Սերգեյ Լավրովն ասել է, թե Ռուսաստանը պատրաստ է շփումների Միացյալ Նահանգների հետ: Նա ասել է, որ եթե բարձր մակարդակի հանդիպման համաձայնություն ձեռք բերվի, ապա այդ մասին կհայտարարվի: